اسلام ٹائمز - تریٹ سیداں، پولیس نے ایف آئی آر کی یقین دہانی کرائی ہے، گل زہرا

مومنین نے بصیرت سے کام لیا اور فوری ردعمل نہیں دیا

تریٹ سیداں، پولیس نے ایف آئی آر کی یقین دہانی کرائی ہے، گل زہرا

کالعدم گروہ اسلحہ لیکر اسلام آباد میں کیونکر موجود تھا؟

میڈیا کو جاری اپنے بیان میں سیدہ گل زہرا رضوی نے کہا ہے پاکستان اسوقت دھیمی آنچ پر سلگ رہا ہے اور یہ آتش فشاں کسی بھی وقت پھٹ سکتا ہے۔ آئے روز کالعدم گروہ جلسے کرکے ملکی آبادی کے بیس فیصد حصے کو کھلے عام کافر کہہ رہے ہیں، امامبارگاہوں پر پتھراؤ کر رہے ہیں، شیعوں کو شہید کر رہے ہیں اور ریاست خاموش تماشائی بنی دیکھ رہی ہے۔

اسلام ٹائمز۔ امامیہ ڈیزاسٹر سیل کی رہنما اور معروف شیعہ سوشل ایکٹویسٹ گل زہرا نے کہا ہے کہ آئے روز ایک کالعدم دہشتگرد گروہ ملک کی بیس فیصد آبادی کو اعلانیہ طور پر کافر قرار دیکر انہیں نشانہ بنانے کی دھمکیاں دے رہا ہے، ان کی مساجد، امام بارگاہوں پہ پتھراؤ کر رہا ہے، ان کی املاک کو نقصان پہنچا رہا ہے جبکہ انتظامیہ مکمل طور پر چپ سادھے ہوئے ہے، انتظامیہ کی خاموشی سے اس امر کو تقویت ملتی ہے کہ دوسرے معاملات سے توجہ ہٹانے کیلئے ملک میں تفرقے کی یہ آگ بھڑکائی جا رہی ہے۔ میڈیا پہ جاری اپنے بیان میں سیدہ گل زہرا رضوی نے کہا ہے کہ کالعدم تنظیم (سپاہ صحابہ) نے ڈی چوک پر تحفظ صحابہ کے عنوان سے جلسہ کیا، جس پر عام شہریوں کے شدید تحفظات تھے اور ٹویٹر پر کئی گھنٹے اسلام آباد انڈر اٹیک کا ٹرینڈ چلتا رہا۔

اس سے پہلے ذمہ دار شہریوں نے اسلام آباد انتظامیہ کو باور کروایا کہ یہ شرپسند ٹولہ اس جلسے میں شیعہ کافر کے نعرے لگائے گا اور فساد پھیلائے گا۔ انتظامیہ، جلسہ تو نہ روک سکی، البتہ شہریوں کو یقین دہانی کرائی کہ مذہبی منافرت پر مبنی کوئی کام نہیں ہونے دیا جائے گا۔ انتظامیہ بہت حد تک اس وعدے پر عمل پیرا رہی، لیکن جلسہ کروانے والوں کا مقصد شر پھیلانا تھا۔ انہوں نے جلسے کے اختتام پر واپسی پر مری روڈ پر اپنی ہی گاڑی کے شیشے توڑ کر اور اسے بنیاد بنا کر اس شرپسند ٹولے نے تریٹ سیداں امام بارگاہ کے پاس سے گزرتے ہوئے علم کی جانب فائرنگ کی۔ کافر کافر کے نعرے لگائے۔ سیدہ گل زہرا رضوی نے مزید کہا کہ سوال یہ پیدا ہوتا ہے کہ اس ٹولے کے پاس اسلحہ کیوں تھا اور اسلحے کیساتھ یہ اسلام آباد میں کیونکر گھوم رہے تھے؟ شروع دن سے ان کا ارادہ مذہبی منافرت پھیلانا تھا اور یہ دہشت گرد اسلحہ اپنے ساتھ لیکر آئے تھے۔ پولیس موقعے پر پہنچی اور اس نے بجائے گرفتاریوں کے محض اس ٹولے کو منتشر کرنے پر اکتفا کیا۔

گل زہرا کا مزید کہنا تھا کہ مری امام بارگاہ میں اہل تشیع نے صبر و حوصلے سے کام لیا اور جوابی ردعمل دینے کے بجائے سڑک پر احتجاج شروع کیا، جو دھرنے میں بدل گیا۔ اس وقت صورتحال یہ ہے کہ مقامی افراد کے مطابق ایس ایس پی علی اکبر شاہ نے فائرنگ کرنے والے دہشتگردوں پر ایف آئی آر درج کرنے کی یقین دہانی کرائی ہے۔ جس کے بعد دھرنا ختم کر دیا گیا ہے۔ گل زہرا کا کہنا تھا کہ پاکستان اس وقت دھیمی آنچ پر سلگ رہا ہے اور یہ آتش فشاں کسی بھی وقت پھٹ سکتا ہے۔ آئے روز کالعدم گروہ جلسے کرکے ملکی آبادی کے بیس فیصد حصے کو کھلے عام کافر کہہ رہے ہیں، امامبارگاہوں پر پتھراؤ کر رہے ہیں، شیعوں کو شہید کر رہے ہیں اور ریاست خاموش تماشائی بنی دیکھ رہی ہے۔ پھر کیوں نہ عام پاکستانی یہ سمجھنے سوچنے پر مجبور ہو جائے کہ ریاست کا مفاد ہی اس خاموشی میں ہے۔ کیوں نہ عام پاکستانی سوچے کہ دوسرے معاملات سے توجہ ہٹانے کیلئے یہ آگ بھڑکائی جا رہی ہے۔؟