0
Monday 21 Sep 2020 20:54
اسرائیل کو کسی صورت تسلیم نہیں کرینگے، عامر خان

ایم کیو ایم وفد کی عامر خان کی قیادت میں ایم ڈبلیو ایم رہنما علامہ باقر زیدی سے ملاقات

ملک میں شیعہ سنی فسادات کرانیوالوں کے چہرے بےنقاب ہو رہے ہیں، علامہ باقر زیدی
ایم کیو ایم وفد کی عامر خان کی قیادت میں ایم ڈبلیو ایم رہنما علامہ باقر زیدی سے ملاقات
اسلام ٹائمز۔ متحدہ قومی موومنٹ کے وفد نے ڈپٹی کنوینر عامر خان کی قیادت میں مجلس وحدت مسلمین کے رہنما علامہ باقر زیدی و دیگر رہنماؤں سے ملاقات کی۔ ملاقات میں ملکی موجودہ صوتحال پر تبادلہ خیال کیا گیا۔ ایم کیو ایم وفد میں رکن سندھ اسمبلی عباس جعفری، اراکین رابطہ کمیٹی عبدالحسیب اور جاوید اختر جبکہ ایم ڈبلیو ایم سے علی حسین نقوی، علامہ مبشر حسن، علامہ صادق جعفری، مولانا غلام عباس، میر تقی ظفر، عارف رضا و دیگر موجود تھے۔ رہنماؤں کی ملاقات کے بعد مشترکہ پریس کانفرنس سے متحدہ قومی موومنٹ پاکستان کے ڈپٹی کنوینر عامر خان نے کہا کہ اسرائیل اور بھارت وطن عزیز میں مذہبی خلفشار پیدا کرنے کوششوں میں ہیں، اسرائیل کو کسی صورت تسلیم نہیں کریں گے، ستر سالوں سے ہمارا بیرونی دشمن ملکی سلامتی کیخلاف سازشیں کر رہا ہے۔

انہوں نے کہا کہ پاکستان میں فرقہ وارانہ ہم آہنگی کیلئے مجلس وحدت مسلمین کی کوششوں کو سراہتے ہیں اور ان شاء اللہ ساتھ مل کر وطن عزیز کو امن کا گہوارہ بنائیں گے، ایم کیو ایم شہر قائد میں شیعہ سنی اتحاد و وحدت کو قائم رکھنے کیلئے نکلی ہے، تمام مکاتب فکر کے علماء کی مشاورت کے بعد بہت جلد ایک بین المسالک اجلاس بلائیں گے، تاکہ مملکت خداداد میں فرقہ واریت کو فروغ دینے والوں کی نفی ہوسکے، 10 محرم الحرام کے بعد شہر میں فرقہ واریت پھیلائی گئی، ملک بھر میں فرقہ واریت پھیلانے کی سازش ہو رہی ہے، یزیدیت زندہ باد کے نعرے لگانے والے مسلمانوں کو تقسیم کرکے ملک کو عدم استحکام کی طرف لے جا رہے ہیں، ہم حسینی ہیں اور یزیدی افکار کیخلاف میدان عمل میں موجود ہیں۔

کانفرنس سے خطاب میں علامہ باقر زیدی نے کہا کہ شہر قائد میں فرقہ وارانہ ہم آہنگی کیلئے کی جانے والی ایم کیو ایم کی کوشش کو سراہتے ہیں، ملک میں شیعہ سنی فسادات کرانے والوں کے چہرے بےنقاب ہو رہے ہیں، عرب ممالک کی جانب سے اسرائیل کو تسلیم کرنے کے بعد پاکستان میں منظم انداز سے فرقہ واریت پھیلائی جا رہی ہے، پاکستان بھر کے شیعہ سنی عوام اپنے ملک میں بیرونی ایجنڈے کو ناکام بنائیں گے، امام حسین (ع) کی ذات تمام مسلمانوں کیلئے نکتہ وحدت ہے، سوشل میڈیا پر مذہبی منافرت پھیلائی جا رہی ہے، ملک بھر میں کالعدم جماعتوں کے جلسوں میں شیعہ کافر کے نعرے نیشنل ایکشن پلان کی کھلی خلاف ورزی ہے، آرمی چیف، وزیراعظم پاکستان پیٖام پاکستان کے بیانیئے کو عملی جامہ پہنائیں اور وطن عزیز کو فرقہ واریت کی آگ میں دھکیلنے والی کالعدم جماعتوں کی بیخ کنی کریں۔
خبر کا کوڈ : 887590
رائے ارسال کرنا
آپ کا نام

آپکا ایمیل ایڈریس
آپکی رائے

منتخب
ہماری پیشکش