QR Code

کورونا کے باعث اسکولوں کو دوبارہ بند کرنے کی باتیں محض افواہ ہے، سعید غنی

1 Oct 2020 20:37

نواب شاہ میں تقریب سے خطاب کرتے ہوئے وزیر تعلیم سندھ نے کہا کہ کورونا وائرس کے اثرات بڑھنے پر لاک ڈؤان کا آپشن موجود ہے، سندھ حکومت مسلسل اسکولوں کی نگرانی کررہی ہے، خراب صورتحال ہونے حالات کے مطابق فیصلہ کیا جائے گا۔

اسلام ٹائمز۔ سندھ کے وزیر تعلیم سعید غنی نے کہا ہے کہ کورونا کے باعث اسکولوں کو دوبارہ بند کرنے کی باتیں محض افواہ ہے۔ نواب شاہ میں چیمبر آف کامرس کی تقریب حلف برداری کے موقع پر منعقدہ تقریب سے خطاب کرتے ہوئے سعید غنی نے کہا کہ کورونا وائرس کے اثرات بڑھنے پر لاک ڈؤان کا آپشن موجود ہے۔ انہوں نے کہا کہ سندھ حکومت مسلسل اسکولوں کی نگرانی کررہی ہے لیکن کورونا کے باعث اسکولوں کو دوبارہ بند کرنے کی باتیں محض افواہ ہے، خراب صورتحال ہونے حالات کے مطابق فیصلہ کیا جائے گا۔ ایک سوال کے جواب میں سعید غنی کا کہنا تھا کہ موجودہ وفاقی حکومت کی موجودگی میں ملکی معیشت ترقی نہیں کرسکتی، گیس کا بحران بڑھتا جارہا ہے، انڈسٹریز بری طرح متاثر ہیں اور مہنگائی عروج پر ہے جب کہ دواؤں کی قیمیتں عام آدمی کی پہنچ سے دور جاچکی ہیں۔

بلدیاتی انتخابات پر صوبائی وزیر نے کہا کہ پیپلز پارٹی چاہتی ہے کہ آئین کے مطابق نئی مردم شماری اور نئی حلقہ بندیوں کے بلدیاتی انتخابات ہوں۔ واضح رہے کہ ملک میں کورونا کیسز میں اضافہ دیکھنے میں آیا ہے اور گزشتہ روز این سی او سی کے اجلاس میں بتایا گیا کہ ملک بھر سے سامنے آنے والے کیسز میں سے نصف کیسز کراچی سے رپورٹ ہوئے ہیں جس کے باعث وزیراعظم کے معاون خصوصی صحت نے لاک ڈاؤن کی تجویز دی تھی۔ کراچی میں کورونا کیسز بڑھنے کے بعد کچھ علاقوں میں مائیکرو اسمارٹ لاک ڈاؤن بھی نافذ کیا گیا ہے۔

خبر کا کوڈ: 889606