اسلام ٹائمز۔ مسلم لیگ ن کے رہنما خواجہ آصف نے کہا ہے کہ استعفوں کا حتمی فیصلہ ہوچکا، کب کیسے دینے ہیں یہ طے ہونا باقی ہے، آئین اور قانون میں ضمنی انتخابات کرانے کی گنجائش موجود ہے لیکن جب 130 ممبران اسمبلی کے استعفے آئیں گے تو حکومت کیلئے نئے الیکشن کے علاوہ کوئی چارہ نہیں ہوگا، خواجہ آصف نے کہا کہ اپوزیشن کی تحریک اتنا زور پکڑے گی جو ہر چیز کو اپنے ساتھ بہا لے جائے گی۔ ہماری تحریک کا ذاتی مقصد نہیں ہے، چاہتے ہیں آئین پر عمل درآمد ہو، ہر بار الیکشن چورائے جاتے ہیں اب ایسا نہیں ہونے دیں گے، پیپلزپارٹی اے پی سی کے فیصلوں میں شریک ہے، تاہم صوبائی اسمبلیوں سے استعفوں کی بات نہیں ہوئی۔