QR Code

عابد ملہی جیسے درندوں کو سرعام پھانسی دے کر عبرت کا نشان بنانا چاہیے، سینیٹر فیصل جاوید

13 Oct 2020 09:28

موٹروے ریپ کیس کے مرکزی ملزم عابد کی گرفتاری پر ردعمل میں سینیٹر فیصل جاوید نے کہا ہے کہ اللہ کا شکر ہے یہ درندہ گرفتار ہوگیا، سخت سے سخت سزاؤں کا ایک جامع قانون تیار کرلیا گیا ہے اور جلد پارلیمنٹ میں پیش کردیا جائے گا۔ 

اسلام ٹائمز۔ تحریک انصاف کے رہنما سینیٹر فیصل جاوید نے موٹروے ریپ کیس کے مرکزی ملزم عابد کی گرفتاری پر ردعمل میں کہا ہے کہ اللہ کا شکر ہے یہ درندہ گرفتار ہوگیا، ایسے درندوں کو سرعام پھانسی دے کر عبرت کا نشان بنانا چاہیے۔ موٹروے ریپ کیس کا مرکزی ملزم عابد ایک ماہ تک فرار رہنے کے بعد فیصل آباد سے گرفتار ہوگیا۔ ملزم کی گرفتاری پر تحریک انصاف کے رہنما سینیٹر فیصل جاوید نے کہا ہے کہ ایسے درندوں کو سرعام پھانسی دے کر عبرت کا نشان بنانا چاہیے، سخت سے سخت سزاؤں کا ایک جامع قانون تیار کرلیا گیا ہے اور جلد پارلیمنٹ میں پیش کردیا جائے گا۔ 

پنجاب کے وزیر اطلاعات فیاض الحسن چوہان نے کہا کہ پراسیکیوشن میں ایک فیصد بھی نااہلی اور کوتاہی نہیں ہوگی، ایسے مجرموں کو سخت سے سخت سزا ملنی چاہیے۔ وزیراعظم عمران خان کے معاون خصوصی برائے سیاسی رابطہ کار شہباز گِل نے کہا کہ ملزم کو قانون کے مطابق پوری سزا ملے گی، پولیس کی کارکردگی بہت اچھی رہی لیکن مزید بہتر بھی ہوسکتی تھی۔ خیال رہے کہ 9 ستمبر کو لاہور کے علاقے گجر پورہ میں موٹر وے پر ایک خاتون کو اجتماعی زیادتی کا نشانہ بنایا گیا۔ واقعے میں 2 افراد نے موٹر وے پر کھڑی گاڑی کا شیشہ توڑ کر خاتون اور اس کے بچوں کو نکالا جس کے بعد ملزمان سڑک کے گرد لگی جالی کاٹ کر سب کو قریبی جھاڑیوں میں لے گئے اور پھر خاتون کو بچوں کے سامنے زیادتی کا نشانہ بنایا۔

خبر کا کوڈ: 891751