اسلام ٹائمز۔ بلوچستان کے علاقے تربت کے قریب دہشت گردوں کی سکیورٹی فورسز پر فائرنگ سے لانس نائیک شہید اور 3 سکیورٹی اہلکار زخمی ہو گئے۔ پاک فوج کے شعبہ تعلقات عامہ (آئی ایس پی آر) کے مطابق تربت کے قریب دہشت گردوں نے سکیورٹی فورسز پر اندھا دھند فائرنگ کردی، جس کے نتیجے میں فوجی جوان شہید اور 3 سکیورٹی اہلکار زخمی ہوگئے۔ ترجمان پاک فوج کے مطابق لانس نائیک وسیم اللہ نے جام شہادت نوش کیا، فائرنگ سے 3 سکیورٹی اہلکار بھی زخمی ہوئے۔ واقعہ تربت سے 35 کلو میٹر جنوب مشرق میں جھکی کے مقام پر پیش آیا۔ واضح رہے کہ گزشتہ 5 روز کے دوران 22 سکیورٹی اہلکار شہید ہو چکے ہیں۔ بلوچستان میں 15، شمالی وزیرستان میں 6 اور باجوڑ میں ایک اہلکار شہید ہوا۔