QR Code

کورونا کی وجہ سے دنیا کی معیشتیں بیٹھ گئیں، اسد عمر

18 Oct 2020 13:30

میڈیا سے گفتگو کرتے ہوئے وفاقی وزیر کا کہنا تھا کہ امریکا جیسے ملک کو تین ٹریلین ڈالر خسارہ ہوا جبکہ بھارت کو گزشتہ 50 سال میں سب سے زیادہ معاشی نقصان اٹھانا پڑا، پاکستان کی معیشت بہتر رہی اور عالمی ادارے بھی اس کی تعریف کر رہے ہیں۔

اسلام ٹائمز۔ وفاقی وزیر برائے منصوبہ بندی، ترقی و اصلاحات اسد عمر نے کہا ہے کہ نواز شریف بیرون ملک بیٹھ کر بھارت کی زبان بول رہے ہیں۔ وفاقی وزیر اسد عمر نے کہا ہے کہ وزیراعظم عمران خان نے صرف مسلم لیگی قائد کے بیانیے کا جواب دیا ہے، یہ کسی ایک شخص کی نہیں بلکہ پورے پاکستان کی بات ہے اس لیے جواب دینا لازمی تھا۔ انہوں نے کہا کہ وزیراعظم عمران خان سب سے زیادہ مہنگائی، بجلی اور گیس سمیت دیگر عوامی مسائل پر بات کرتے ہیں اور وہ عوام کو ریلیف دینے کے لیے پورا ہفتہ دن رات کوشش کر رہے ہیں۔ نجی ٹی وی سے گفتگو کرتے ہوئے انھوں نے کہا کورونا کی وجہ سے دنیا کی معیشتیں بیٹھ گئیں، امریکا جیسے ملک کو تین ٹریلین ڈالر خسارہ ہوا جبکہ بھارت کو گزشتہ 50 سال میں سب سے زیادہ معاشی نقصان اٹھانا پڑا، پاکستان کی معیشت بہتر رہی اور عالمی ادارے بھی اس کی تعریف کر رہے ہیں۔ اسد عمر نے کہا حکومت چینی مافیا کے خلاف کارروائی کر رہی ہے، یہ پہلی حکومت ہے کہ اس کے دور میں قومی اسمبلی اور پنجاب اسمبلی میں سیاسی رہنماؤں کو پروڈکشن آرڈر ملے۔ انھوں نے کہا حفاظتی تدابیر پر عمل نہ کیا گیا تو وبا پھیلنے کا خدشہ ہو گا، میری تمام سیاسی جماعتوں سے اپیل ہے کہ وہ بڑے اجتماع سے گریز کریں۔

خبر کا کوڈ: 892704