QR Code

اپوزیشن رہنما ملک دشمنی کی حد پار کر چکے ہیں، عثمان بزدار

31 Oct 2020 12:45

وزیراعلیٰ پنجاب نے کہا کہ 22 کروڑ عوام مسلح افواج کے ساتھ سیسہ پلائی دیوار کی طرح کھڑے ہیں، ملک دشمن کا ایجنڈا پاکستان میں نہ پہلے چلا ہے نہ آئندہ چلنے دیا جائے گا۔

اسلام ٹائمز۔ وزیراعلیٰ پنجاب عثمان بزدار کا ایاز صادق کے متنازع بیان پر کہنا ہے کہ ایاز صادق سمیت دیگر اپوزیشن رہنماؤں کے بیانات ناقابل فہم اور قومی مفادات کے یکسر منافی ہیں، اپوزیشن رہنما ملک دشمنی کی حد پار کر چکے ہیں۔ عثمان بزدار نے کہا کہ ایاز صادق اور بعض اپوزیشن رہنماؤں کے بیانات ناقابل فہم اور قومی مفادات کے یکسر منافی ہیں، ایسے بیانات ملک دشمنی کے بیانیے کے عکاس ہیں۔ انہوں نے کہا کہ پاکستان کے عوام شر انگیز بیانیے کو مکمل مسترد کرتے ہیں، ایاز صادق سمیت بعض اپوزیشن رہنما ملک دشمنی کی حد پار کرچکے ہیں۔ عثمان بزدار نے کہا کہ پاکستان کی مسلح افواج پر پوری قوم کو فخر ہے، پاک فوج مشکل کی ہر گھڑی میں سرخرو رہی ہے، ہماری مسلح افواج قوم کی آن، شان اور مان ہیں۔ وزیراعلیٰ پنجاب نے کہا کہ 22 کروڑ عوام مسلح افواج کے ساتھ سیسہ پلائی دیوار کی طرح کھڑے ہیں، ملک دشمن کا ایجنڈا پاکستان میں نہ پہلے چلا ہے نہ آئندہ چلنے دیا جائے گا۔

خبر کا کوڈ: 895106