اسلام ٹائمز - امریکی اور جرمن کمپنیوں نے کورونا ویکسین تیار کرلی

امریکی اور جرمن کمپنیوں نے کورونا ویکسین تیار کرلی

ویکسین کو کئی ممالک کی آبادی پر بڑے پیمانے پر آزمایا گیا ہے اور تجزیہ کاروں کے توقع کے برعکس اس نے بہترین کارکردگی دکھائی ہے، تاہم یہ اولین ابتدائی تجربات ہے اور ویکسین کی آزمائش اب تک جاری ہے۔

اسلام ٹائمز۔ کورونا وبا کے تناظر میں ایک اچھی خبر سامنے آئی ہے، جس میں ایک ویکسین کو وسیع پیمانے پر آزمایا گیا ہے اور اس کے 90 فیصد نتائج سامنے آئے ہیں۔مشہور ادویہ ساز امریکی کمپنی فائزر اور جرمن کمپنی بایون ٹیک نے مشترکہ طور پر ایک ویکسین کی وسیع پیمانے پر آزمائش کے نتائج ظاہر کیے ہیں اور اس میں 90 فیصد کامیابی حاصل ہوئی ہے۔ یعنی یہ ویکسین 100 میں سے 90 افراد کو وائرس کے حملے سے بچا سکتی ہے۔ اس کے بعد ایک جانب تو ان کمپنیوں کا شہرہ ہوگیا ہے تو دوسری طرف اب تک 10 لاکھ سے زائد افراد کو ہلاک کرنے والے کووڈ 19 مرض کو لگام دینے کی امید پیدا ہوئی ہے۔ توقع ہے کہ فائزر اور بایوین ٹیک کی یہ ویکسین سال کے اختتام تک دستیاب ہوسکے گی۔

ویکسین کو کئی ممالک کی آبادی پر بڑے پیمانے پر آزمایا گیا ہے اور تجزیہ کاروں کے توقع کے برعکس اس نے بہترین کارکردگی دکھائی ہے، تاہم یہ اولین ابتدائی تجربات ہیں اور ویکسین کی آزمائش اب تک جاری ہے، جس کا سلسلہ دسمبر تک چلتا رہے گا۔ اس ماہ کے اختتام تک اس کا تمام سیفٹی ڈیٹا ظاہر کر دیا جائے گا۔ یہی وجہ ہے کہ کمپنیاں دن رات ویکسین پر کام کر رہی ہیں۔ فائزر کمپنی کے صدر دفاتر نیویارک میں ہیں جبکہ بایوین ٹیک ایک چھوٹی کمپنی ہے، جسے جرمنی اور یورپی سرمایہ کاری بینک کی مدد حاصل ہے۔ ان دونوں کمپنیوں نے کہا ہے کہ اب تک اس کے حفاظتی پہلوؤں پر خوش اسلوبی سے کام جاری ہے اور کوئی منفی ضمنی اثرات (سائیڈ افیکٹ) سامنے نہیں آئے ہیں۔