اسلام ٹائمز - پاکستان کا نئے افغان ٹریڈ ٹرانزٹ معاہدے کا فیصلہ

پاکستان کا نئے افغان ٹریڈ ٹرانزٹ معاہدے کا فیصلہ

حکومتی ذرائع کے مطابق پاک افغان ٹرانزٹ ٹریڈ معاہدے پر دونوں ملکوں کے مذاکرات 16 نومبر سے ہونگے جبکہ تجارتی تعلقات میں اہم پیشرفت اور دو طرفہ آزادانہ تجارت کے معاہدہ پر بات چیت کا امکان ہے۔

اسلام ٹائمز۔ پاکستان اور افغانستان ترجیحی تجارتی معاہدہ کے لیے مذاکرات پر متفق ہوگئے ہیں اور اس ضمن میں پاکستان نے افغانستان کے ساتھ افغان ٹریڈ ٹرانزٹ کا نیا 10 سالہ معاہدہ کرنے کا فیصلہ کیا ہے۔ حکومتی ذرائع کے مطابق پاک افغان ٹرانزٹ ٹریڈ معاہدے پر دونوں ملکوں کے مذاکرات 16 نومبر سے ہوں گے جبکہ تجارتی تعلقات میں اہم پیش رفت اور دو طرفہ آزادانہ تجارت کے معاہدہ پر بات چیت کا امکان ہے۔ ذرائع کے مطابق پاکستانی وفد مشیر تجارت عبدالرزاق داؤد کی قیادت میں افغانستان کا دورہ کرے گا، مشیر تجارت 16 نومبر کو 3 روزہ دورہ پر افغانستان پہنچیں گے۔

حکومتی ذرائع کا کہنا ہے کہ افغانستان نے 30 مصنوعات کی فہرست پاکستان کو فراہم کر دی ہے جبکہ نئے مذاکرات میں پاکستان اپنی مصنوعات کی فہرست افغانستان کو فراہم کرے گا۔ وفاقی حکام کے مطابق پہلے مرحلے میں ترجیحی تجارتی معاہدہ اور دوسرے مرحلے میں آزاد تجارتی معاہدے پر بات چیت ہوگی۔ واضح رہے کہ پاک افغان ٹرانزٹ ٹریڈ کا معاہدہ آئندہ سال کے آغاز پر ختم ہو رہا ہے جبکہ نیا معاہدہ 10 سال کے لیے ہوگا۔