تحریک لبیک اور حکومت کے مذاکرات، دھرنا ختم ہونیکا امکان

اسلام ٹائمز۔ گستاخانہ خاکوں کی اشاعت اور فرانس کے صدر کی جانب سے ان توہین آمیز خاکوں کی حمایت کیخلاف احتجاجی دھرنہ دینے والی بریلوی مسلک کی جماعت تحریک لبیک پاکستان نے فیض آباد راولپنڈی میں جاری احتجاجی دھرنا ختم کرنے پر آمادگی کا اظہار کردیا۔ تفصیلات کے مطابق وزیر اعظم کی ہدایت پر وزیر مذہبی امور پیر نور الحق قادری نے ٹی ایل پی کے سربراہ علامہ خادم رضوی سے مذاکرات کیے۔ وزیر داخلہ سید اعجاز شاہ ، کمشنر اسلام آباد عامر احمد اور مشیر داخلہ شہزاد اکبر اور سیکریٹری داخلہ بھی مذاکراتی ٹیم میں شامل تھے۔ ٹی ایل پی کے سربراہ علامہ خادم رضوی کی جانب سے کچھ دیر میں دھرنا ختم کیے جانے کا اعلان متوقع ہے۔ واضح رہے اس سے قبل اسلام آباد انتظامیہ نے فرانس میں گستاخانہ خاکوں کی اشاعت کے خلاف تحریک لبیک پاکستان (ٹی ایل پی) کے احتجاجی مظاہروں کے پیش نظر فیض آباد میں پولیس، رینجرز اور فرنٹیئر کور کے 3 ہزار 113 سیکیورٹی اہلکاروں کو تعینات کردیا۔

گزشتہ روز راولپنڈی میں منعقدہ احتجاجی ریلی میں 5 ہزار افراد نے شرکت کی تھی۔