ملزم کی سزائے موت عمر قید میں تبدیل، مشال خان کے والد کا فیصلے کیخلاف سپریم کورٹ جانیکا اعلان

اسلام ٹائمز۔ پشاور ہائیکورٹ نے مشال قتل کیس کا محفوظ فیصلہ سناتے ہوئے مرکزی مجرم عمران کی سزائے موت کالعدم قرار دیتے ہوئے اسے عمر قید میں تبدیل کر دیا ہے، جبکہ ضمانت پر رہا دیگر مجرموں کو دوبارہ گرفتار کرنے کا حکم دیدیا گیا ہے۔ پشاور ہائیکورٹ نے کیس میں باقی تمام اپیلیں خارج کر دی ہیں۔ حکومت اور مشال کے والد نے اپیلیں دائر کی تھیں، جبکہ سزا یافتہ مجرموں نے بریت کیلئے اپیلیں دائر کی تھیں۔ خیال رہے کہ مشال خان کو 2017ء میں مردان یونیورسٹی میں ہجوم نے تشدد کرکے مار دیا تھا۔ تفصیلات کے مطابق پشاور ہائیکورٹ نے عبدالولی خان یونیورسٹی مردان کے طالبعلم مشال قتل کیس میں محفوظ فیصلہ سنا دیا ہے۔ جسٹس لعل جان خٹک اور جسٹس عتیق شاہ نے یہ فیصلہ سنایا۔

عدالت نے کیس میں مرکزی مجرم عمران کی سزائے موت کو عمر قید میں تبدیل کر دیا ہے۔ عدالت نے 25 مجرموں جن کو ضمانت پر رہا کیا گیا تھا کی ضمانت مسترد کرتے ہوئے گرفتار کرنے کا حکم دیدیا ہے۔ پشاور ہائیکورٹ نے ملزموں کی تین سال کی سزا، عمر قید کی سزا پانے والے 7 مجرموں اور باقی ملزمان کی سزا کو بھی برقرار رکھا ہے۔ حکومت اور مشال کے والد نے اے ٹی سی فیصلوں کیخلاف اپیلیں دائر کی تھیں، جبکہ کیس میں سزا یافتہ مجرموں نے بریت کیلئے اپیلیں دائر کی تھیں۔ مشال قتل کیس میں 61 ملزموں کو نامزد کیا گیا تھا۔ انسداد دہشت گردی عدالت نے مرکزی مجرم عمران کو سزائے موت سنائی تھی، 7 مجرموں کو 25، 25 سال کی سزا، جبکہ 25 مجرموں کو تین تین سال قید کی سزا ہوئی تھی۔

انسداد دہشت گردی عدالت نے 28 ملزمان کو بری کیا تھا۔ مشال خان کے والدنے پشاور ہائی کورٹ کے فیصلے کیخلاف سپریم کورٹ جانے کا اعلان کرتے ہوئے کہا مشال خان واپس نہیں آسکتا لیکن میں انصاف کیلئے جدوجہد کررہا ہوں۔ مشال کے والد محمد اقبال نے میڈیا سے گفتگو کرتے ہوئے فیصلے کیخلاف سپریم کورٹ جانے کا اعلان کر دیا۔ محمد اقبال نے کہا کہ مشال خان واپس نہیں آسکتا، لیکن میں انصاف کیلئے جدوجہد کر رہا ہوں، ہم نے اپیلیں سزائیں بڑھانے کیلئے دائر کی تھیں، فیصلہ کرنا ججز کا اختیار ہے، وکلا سے مشاورت کرکے سپریم کورٹ میں اپیل دائر کریں گے۔