اسلام ٹائمز۔ پاکستانی تحقیقاتی ادارے ’’ایف آئی اے‘‘ کو امریکہ نے امداد کی پیشکش کر دی۔ امریکہ کی جانب سے کہا گیا ہے کہ ایف آئی اے کو جدید ٹیکنالوجی سے لیس کرنے کیلئے وہ 2 ارب 25 کروڑ روپے کی مالی معاونت کیلئے تیار ہے۔ اس حوالے سے اقوام متحدہ کے ادارے ڈرگ اینڈ کرائم نے ایف آئی اے کو خط بھی لکھا ہے جس میں 2 ارب 25 کروڑ روپے دینے کی پیشکش کی ہے۔ امریکہ کی جانب سے یہ خط ایک ماہ قبل بھجوایا گیا تھا تاہم ایف آئی اے کی جانب سے تاحال کوئی جواب نہیں دیا گیا۔ ذرائع کے مطابق ایف آئی اے حکام امریکی امداد وصول کرنے سے قبل اس کی شرائط پر غور کر رہے ہیں جس کے بعد ہی کوئی فیصلہ کیا جائے گا۔ ذرائع کے مطابق امریکہ ایف آئی اے کو جدید ٹیکنالوجی اور ٹریکرز سمیت دیگر سہولیات کیلئے مالی امداد دینے کا خواہشمند ہے، جس کے بعد ایف آئی اے کو جدید ٹیکنالوجی سے لیس کیا جائے گا۔