73 کے آئین کی روشنی مولانا فضل الرحمان کی جمہوریت پسندی کا حافظ حسین احمد کا روشن تجزیہ

اسلام ٹائمز۔ جمعیت علمائے اسلام (ف) کی مجلس عاملہ کی جانب سے کیے جانے والے فیصلے کے تحت پارٹی سے نکالے جانے والے سینیئر سیاستدان حافظ حسین احمد نے کہا ہے کہ ملک میں جمہوریت کے قیام اور اظہار رائے کی آزادی کے دعویدار جمعیت میں موروثیت کے قائل ہیں۔ نجی ٹی وی سے بات چیت کرتے ہوئے حافظ حسین احمد نے کہا کہ انہوں نے جمعیت علمائے اسلام میں اس وقت شمولیت اختیار کی تھی، جب مرحوم مولانا مفتی محمودؒ سربراہ تھے۔ انہوں نے کہا کہ 1973ء میں جب انہوں نے شمولیت اختیار کی تھی تو اس کی رسید حضرت مولانا مفتی محمودؒ نے باقاعدہ اپنے دستخط سے دی تھی جبکہ مولانا فضل الرحمان نے جمعیت میں شمولیت 80-81 میں اختیار کی تھی۔ انہوں نے کہا کہ اسی طرح مولانا شیرانی بھی جمعیت کے بانی اراکین میں سے ہیں۔

سابق سینیٹر حافظ حسین احمد نے کہا کہ نہ تو جمعیت علمائے اسلام (ف) سے نکالے جانے کا انہیں کوئی نوٹس بھیجا گیا اور نہ ہی فرد جرم عائد کی گئی بلکہ ایک ڈکٹیٹرانہ انداز میں پارٹی سے نکال دیا گیا، جس کی اطلاع میڈیا کے ذریعے مجھے ملی ہے۔ ایک سوال کے جواب میں انہوں نے یاد دلایا کہ جب مولانا شیرانی نے مولانا فضل الرحمان کے مقابلے میں صدارت کے لیے اپنا نام تجویز کیا تھا، جیسا کہ کسی بھی شخص کا جمہوری حق ہے تو اس وقت مولانا فضل الرحمان نے پشاور میں تین دن تک جنرل کونسل کا اجلاس نہیں ہونے دیا تھا، کیونکہ ان کی خواہش اور کوشش تھی کہ وہ بلامقابلہ صدر منتخب ہوں۔ انہوں نے کہا کہ اس وقت چند افراد نے مداخلت کی تھی اور اکٹھے رکھنے کے لیے مولانا شیرانی کو سمجایا تھا کہ وہ اس مرتبہ اپنا نام واپس لے لیں اور آئندہ اپنا نام پیش کریں تو وہ بات مان گئے تھے۔

جے یو آئی کے بنیادی آئین کے حوالے سے انہوں نے تسلیم کیا کہ ابتداء میں ایک دو مرتبہ کے بعد پھر کسی اور کے لیے عہدہ چھوڑنا ہوتا تھا اور صدر منتخب ہونا ممکن نہیں تھا، لیکن جب مولانا فضل الرحمان منتخب ہوئے تو پہلے انہوں نے کوشش کی کہ انہیں تاحیات صدر منتخب کر لیا جائے، مگر جب مخالفت ہوئی تو پھر چھوٹی ترمیم کی، جس کے تحت اب وہ مسلسل صدر ہیں۔ مولانا فضل الرحمان کے حوالے سے انہوں نے کہا کہ اپنے بھائی، بیٹے، برادر نسبتی اور چند دیگر رشتہ داروں کو جن کی تعداد 15/46 بنتی ہے، کو انہوں نے ٹکٹیں دیں اور پرانے لوگوں کو بائی پاس کیا۔ انہوں نے کہا کہ اسی طرح سینیٹ کے ٹکٹوں میں ہوا، جس کی باقاعدہ شکایات بھی کی گئیں۔ انہوں نے کہا کہ پارٹی اجلاس میں اس پر بات بھی کی گئی اور وجہ بھی سامنے تھی۔ حافظ حسین احمد نے کہا کہ ایک ٹی وی اینکر نے ان سے پوچھا کہ آپ کہتے ہیں کہ اسلام آباد میں میرے پاس جھونپڑی بھی نہیں ہے تو جس کروڑوں روپے مالیت کے بنگلے میں بیٹھے ہیں، یہ کس کا ہے؟ تو انہوں نے کہا کہ یہ دوست نے لے کر دیا ہے۔

ان کا کہنا تھا کہ ہر مرتبہ اور ہر وقت خاموش رہنا بھی مشکل ہو جاتا ہے۔ انہوں نے کہا کہ ہماری کوشش تھی کہ گھر کی باتیں گھر میں رہیں تو پارٹی میں سوالات اٹھائے، جس کا نتیجہ یہ نکلا کہ وہی چاروں افراد جنہوں نے اعتراضات کیے تھے، وہ پارٹی سے نکال دیئے گئے ہیں۔ ایک سوال پر انہوں نے کہا کہ مولانا گل نصیب خان کو ٹکٹ ملا جیسا کہ پارٹی کا فیصلہ تھا، لیکن وہ الیکشن ہار گئے جبکہ بھائی جیت گئے تو یہ سب کیسے ہوا۔؟ ایک سوال پر انہوں نے کہا کہ چار افراد کو نکالنےکے ساتھ ہی یہ حکم بھی جاری کیا گیا ہے کہ جو ان سے ملا اس کو بھی نکال دیں گے۔ انہوں نے استفسار کیا کہ یہ جمہوریت کی کون سی قسم ہے کہ اختلاف رائے سب سے بڑا جرم قرار دے دیا گیا۔؟ ایک سوال پر انہوں نے کہا کہ مجھ سے تو پہلے بھی دو تین مرتبہ اختلاف ہوچکا ہے اور مجھ سے عہدے وغیرہ واپس لیے جا چکے ہیں جبکہ اس مرتبہ میرا بنیادی قصور یہ تھا کہ جب کوئٹہ جلسے میں میاں نواز شریف نے فوجی قیادت پر الزامات عائد کیے تو میں نے برملا کہا کہ یہ نواز شریف کا ذاتی مؤقف ہے اور پی ڈی ایم یا جے یو آئی کا اس سے کوئی تعلق نہیں ہے۔

حافظ حسین احمد سے جب پوچھا گیا کہ پی ڈی ایم کا مستقبل کیا ہوگا؟ تو انہوں نے برملا کہا کہ ہم نے ابتداء میں کہا تھا کہ یہ استعفے نہیں دیں گے تو اب نہیں دے رہے ہیں۔ انہوں نے کہا کہ اسی طرح اس بات کی بھی نشاندہی کی تھی کہ آزادی مارچ کی طرح دھوکہ دیں گے تو وہ بھی قریب ہے۔ نجی ٹی وی کے استفسار پر حافظ حسین احمد نے کہا کہ ہم سب جمعیت علمائے اسلام پاکستان کے اراکین تھے اور ہیں۔ انہوں نے کہا کہ (ف) کا اضافہ تو مولانا فضل الرحمان نے کیا تھا۔ ان کا کہنا تھا کہ آئندہ کی حکمت عملی سے متعلق سوچ بچار کریں گے اور مشاورت بھی ہوگی۔