اسلام ٹائمز۔ سنی اتحاد کونسل کے ترجمان کے مطابق سنی اتحاد کونسل کے چیئرمین صاحبزادہ حامد رضا کی ہدایت پر کل جمعہ کو نئے عیسوی سال کی مناسبت سے یکم جنوری کو ملک بھر میں ”یوم دعا “ منایا جائے گا جبکہ نیو ائیر نائٹ کو ”شب درود و سلام“ کے طور پر منایا جائے گا۔ اس سلسلہ میں ملک بھر کی ہزاروں اہلسنّت مساجد میں خطبات جمعہ میں نئے سال کو اسلامی طرز پر منانے کے طریقہ کار پر خطبات دیئے جائیں گے اور نماز جمعہ کے بعد ملکی سلامتی و استحکام، قومی اتحاد و اتفاق، ملک میں نظام مصطفی کے نفاذ اور قوم کے ہر فرد کی صحت و سلامتی سمیت کورونا سے مکمل نجات اور عام آدمی کے طرز زندگی میں بہتری کیلئے دعائیں مانگی جائیں گی۔ اس دن خصوصی نوافل کا اہتمام بھی کیا جائے گا۔