مچھ میں شہید ہونیوالے کان کنوں کی میتیں ہزارہ ٹاؤن کی امام بارگاہ منتقل

اسلام ٹائمز۔ سانحہ مچھ کے متاثرین کے وفاقی و صوبائی حکومت سے مذاکرات کامیاب ہونے کے بعد کوئٹہ کے مغربی بائی پاس پر جاں بحق کان کنوں کی میتیں رکھ کر کیا جانے والا دھرنا ختم ہو گیا۔ سانحہ مچھ میں شہید کان کنوں کی میتیں ہزارہ ٹاؤن کی امام بارگاہ ولی عصر منتقل کر دی گئی ہیں، جہاں نمازِ جنازہ کے بعد ان کی تدفین آج ہی کی جائے گی۔ شہدائے سانحۂ مچھ کی تدفین کے اعلان کے بعد مختلف شہروں میں جاری دھرنے بھی ختم کر دیئے گئے ہیں۔ کراچی کی نمائش چورنگی سمیت 30 سے زائد مقامات سے مظاہرین گھروں کو واپس لوٹ گئے۔  لاہور میں گورنر ہاؤس اور دیگر مقامات پر جاری دھرنے کے شرکاء بھی گھروں کو چلے گئے۔ اسلام آباد کے ڈی چوک، ملتان، سیالکوٹ اور حیدر آباد سمیت سندھ کے مختلف شہروں میں جاری احتجاج بھی ختم کر دیا گیا ہے۔