QR CodeQR Code

داعش جیسی بدنام زمانہ دہشتگرد تنظیم کا اظہار وجود کرنا ریاستی اداروں کیلئے لمحہ فکریہ ہے، علامہ مقصود ڈومکی

12 Jan 2021 20:11

درگاہ سفر شاہ پر مجلس عزاء کے بعد میڈیا سے گفتگو کرتے ہوئے ایم ڈبلیو ایم کے مرکزی ترجمان کا کہنا تھا کہ داعشی تفکر اور ان کی نرسری سپاہ صحابہ، لشکر جھنگوی کے خلاف آپریشن ضرب عضب کی طرز پر ملک گیر آپریشن کی ضرورت ہے۔


اسلام ٹائمز۔ مجلس وحدت مسلمین پاکستان کے مرکزی ترجمان علامہ مقصود علی ڈومکی نے ایام فاطمیہ سلام اللہ علیھا کی مناسبت سے درگاہ سفر شاہ پر منعقدہ سالانہ عرس کے موقع پر مجلس عزا سے خطاب کرتے ہوئے کہا ہے کہ حضرت سیدہ بی بی فاطمہ زہرا سلام اللہ علیھا کی ذات گرامی میں عالم انسانیت کے لئے اسوہ اور نمونہ ہے۔ آپ (س) نے مدینہ طیبہ کی مسجد نبوی میں جو تاریخی خطبہ دیا وہ آج علم و عرفان کا سمندر ہے۔ آپ (س) کی سیرت اور کردار میں اپنے والد گرامی حضرت سید الانبیاء صلی اللہ علیہ وآلہ وسلم کی ذات گرامی کا عکس تھیں۔ اسی لئے حضور اکرم (ص) فرمایا کرتے تھے کہ فاطمہ (س) میرے جگر کا ٹکڑا ہے جس نے اسے تکلیف دی اس نے مجھے تکلیف دی۔ انہوں نے کہا کہ ایام فاطمیہ (س) کے موقع پر تمام امت مسلمہ کو خاتون جنت سیدۃ النساء العالمین کی ذات گرامی سے منسوب مختلف پروگرامز، مجالس عزا اور کانفرنسز کا اہتمام کرنا چاہیے، جس میں سیدہ کائنات کی سیرت طیبہ کو بیان کیا جائے۔

اس موقع پر میڈیا سے گفتگو کرتے ہوئے انہوں نے کہا کہ ملک میں ایک دفعہ پھر کالعدم تکفیری گروہ ایکٹو ہو چکے ہیں، داعش جیسی بدنام زمانہ دہشت گرد تنظیم کا اظہار وجود کرنا ریاستی اداروں کے لئے لمحہ فکریہ ہے۔ داعشی تفکر اور ان کی نرسری سپاہ صحابہ، لشکر جھنگوی کے خلاف آپریشن ضرب عضب کی طرز پر ملک گیر آپریشن کی ضرورت ہے۔ انہوں نے کہا کہ درگاہ کے منتظمین نے عرس کی سالانہ تقریبات کو سانحہ مچ کے شہداء کے غم میں منسوخ کرکے یہ پیغام دیا ہے کہ ہم مظلوم ہزارہ شیعہ شہداء کے غم میں برابر کے شریک ہیں۔


خبر کا کوڈ: 909718

خبر کا ایڈریس :
https://www.islamtimes.org/ur/news/909718/داعش-جیسی-بدنام-زمانہ-دہشتگرد-تنظیم-کا-اظہار-وجود-کرنا-ریاستی-اداروں-کیلئے-لمحہ-فکریہ-ہے-علامہ-مقصود-ڈومکی

اسلام ٹائمز
  https://www.islamtimes.org