بھارت، کسانوں نے زرعی اصلاحات کے قوانین کی کاپیاں جلائیں

اسلام ٹائمز۔ بھارت میں زرعی اصلاحات کے قوانین کی مخالفت کرنے والی کسان تنظیموں نے آج ملک بھر میں ان قوانین کی کاپیاں جلائیں۔ آل انڈیا کسان سنگھرش کوآرڈینیشن کمیٹی (اے آئی کے ایس سی سی) کی جاری پریس ریلیز کے مطابق تحریک کے 49ویں دن کسانوں نے مختلف ریاستوں میں ان تینوں قوانین کی کاپیاں جلائیں اور ان کی منسوخی پر زور دیا۔ اس موقع پر دہلی کے قریب تمام اضلاع سے یوم جمہوریہ کسان ٹریکٹر پریڈ کی تیاری کی اپیل کی۔ کمیٹی نے کہا کہ آج ملک بھر میں 20 ہزار سے زائد مقامات پر قانون کی کاپیاں جلائی گئیں۔ اے آئی کے ایس سی سی نے دہلی کے آس پاس کے 300 کلومیٹر کے تمام اضلاع کے کسانوں سے اپیل کی ہے کہ وہ دہلی میں یوم جمہوریہ ٹریکٹر پریڈ کی تیاری کریں اور سرحدوں پر جمع ہوں۔ بھارت میں 18 جنوری کو تمام اضلاع میں یوم خواتین کسان منایا جائے گا، بنگال میں 20 سے 22 جنوری، مہاراشٹر میں 24 سے 26 جنوری، کیرالا، تلنگانہ، آندھرا پردیش میں 23 سے 25 جنوری اور اوڈیشہ میں 23 جنوری کو گورنر کے آفس کے سامنے اجتماع کیا جائے گا۔

اے آئی کے ایس سی سی نے کہا ہے کہ گذشتہ 50 دنوں سے مودی حکومت نے ملک کے عوام اور کسانوں کے سامنے مستقل طور پر کوئی سچائی پیش نہیں کی ہے کہ ان قوانین سے کسانوں کو کیا فائدہ ہوگا۔ اس کا استدلال ہے کہ تکنیکی ترقی، سرمایہ کاری اور مجموعی طور پر ترقی ہوگی۔ حکومت نے نجی سرمایہ کاروں کی مدد کے لئے ایک لاکھ کروڑ روپئے مختص کیے ہیں لیکن وہ تکنیکی ترقی، سرمایہ کاری اور دیگر اہم امور پر سرمایہ کاری نہیں کرنا چاہتی۔ جب کارپوریٹ سرمایہ کاری کرے گا تو اس کا مقصد زیادہ منافع حاصل کرنا اور زمین اور پانی کے وسائل پر قبضہ کرنا ہے۔ تنظیم نے الزام لگایا ہے کہ حکومت نہ صرف کسانوں کے بارے میں اپنی ذمہ داریوں کو نبھانے میں ناکام رہی ہے بلکہ ملک کی سپریم کورٹ کے سامنے بھی حقائق پیش نہیں کیا ہے۔