QR CodeQR Code

دُختر پیغمبر گرامی کی ذات مبارکہ، عالم ِاسلام کیلئے نمونہ عمل ہے، علامہ ساجد نقوی

16 Jan 2021 22:31

ایام فاطمیہؑ کی مناسبت سے جاری ایک بیان میں ایس یو سی کے سربراہ کا کہنا تھا کہ جناب سیدہؑ کا دختر رسول ہونے کے حوالے سے احترام اور عقیدت اپنی جگہ، لیکن انکا یہ پہلو سب سے منفرد اور نمایاں ہے کہ وہ عالم نسواں کیلئے قیامت تک نمونہ عمل ہیں۔


اسلام ٹائمز۔ ایام فاطمیہؑ کی مناسبت سے شیعہ علماء کونسل پاکستان کے سربراہ علامہ سید ساجد علی نقوی نے کہا کہ مسلمانوں کی ہدایت اور رہنمائی کا منبع قرآن کریم اور سنت رسول اکرم ہے اور قرآنی احکام کے مطابق پیغمبر گرامی کی ذات مبارک عالم اسلام کے لئے نمونہ عمل ہے جبکہ پیغمبر اکرم کی اپنی ہدایت اور رہنمائی کے مطابق خواتین عالم کے لئے ماں، بیوی اور بیٹی ہر زاویہ نگاہ سے بہترین نمونہ عمل اور آئیڈیل شخصیت جناب سیدہ فاطمہ زہرا ؑ کی ذات گرامی ہے۔ جناب سیدہؑ کا دختر رسول ہونے کے حوالے سے احترام اور عقیدت اپنی جگہ، لیکن ان کا یہ پہلو سب سے منفرد اور نمایاں ہے کہ وہ عالم نسواں کے لئے قیامت تک نمونہ عمل ہیں۔ انہوں نے عمل اور اخلاق کے میدان میں اپنی زندگی کے جو اصول اور نقوش چھوڑے ہیں، وہ دائمی اور ابدی ہیں۔ کسی زمانے، معاشرے یا علاقے تک مخصوص اور مختص نہیں ہیں۔ ان کے چھوڑے ہوئے اصول و نقوش کو مدنظر رکھ کر موجودہ دور کی خواتین کیلئے طرز معاشرت کا تعین کیا جانا چاہیئے۔

علامہ ساجد نقوی نے کہا کہ موجودہ سنگین دور میں جب خواتین میں فکری انتشار پیدا ہوچکا اور عورت کے بارے میں منفی سوچ فروغ پاچکی ہے، ترقی و جدت کے نام پر عورتوں کا ہر معاشرے میں شدت سے استحصال کیا جا رہا ہے اور ایسے حالات میں سیدہ فاطمہ زہراؑ کی سیرت و کردار ہی واحد ذریعہ ہے، جو دنیا بھر کی خواتین کو انحراف، استحصال، تعیش اور گناہوں سے بچا سکتا ہے۔ آزادی نسواں کی حدود و قیود ہر سوسائٹی نے مقرر کر رکھی ہیں، سوائے ان لوگوں کے جو مادر پدر آزاد ہیں اور کسی ضابطے، اخلاق اور قانون کے پابند نہیں، یہی لوگ ایسے معاشروں کی تشکیل میں مصروف ہیں، جہاں عورت کو فحاشی کے لئے استعمال، اسکی عزت و حرمت کو پامال اور مرد و زن کے اختلاط سے معاشروں میں بگاڑ پیدا کیا جاسکے۔

لہذا ان حالات میں امت مسلمہ خواتین کی آزادی کے ان اصولوں کی روشنی میں جدوجہد کرے، جو جناب سیدہ فاطمہ زہراؑ کی طرف سے عطا ہوئے ہیں۔ ان کا مزید کہنا تھا کہ خواتین کو چاہیئے کہ وہ اپنے خاندانی اور ذاتی معاملات سے لے کر اجتماعی معاملات تک ہر موقع پر سیدہؑ کی شخصیت کو مدنظر رکھیں۔ اس کے ساتھ ساتھ اپنی گود سے ایسی نیک سیرت نسل معاشرے کو فراہم کریں، جو دنیا میں اسلامی طرز حیات کو متعارف کرنے کی استعداد رکھتی ہو، جیسا کہ حضرت فاطمہؑ کی پاکیزہ گود سے حسن ؑ اور حسین ؑ جیسی آئیڈیل شخصیات پیدا ہوئیں، جنہوں نے وقت اور تاریخ کے دھارے کے رخ کو موڑ دیا۔


خبر کا کوڈ: 910600

خبر کا ایڈریس :
https://www.islamtimes.org/ur/news/910600/د-ختر-پیغمبر-گرامی-کی-ذات-مبارکہ-عالم-اسلام-کیلئے-نمونہ-عمل-ہے-علامہ-ساجد-نقوی

اسلام ٹائمز
  https://www.islamtimes.org