اسلام ٹائمز - ہم نے وہی کیا جو ہم کرنے آئے تھے

اپنے ویڈیو پیغام میں ٹرمپ کا کہنا ہے کہ فخر ہے کہ میں دہائیوں میں وہ پہلا صدر ہوں، جس نے کوئی نئی جنگیں شروع نہیں کیں۔

اسلام ٹائمز۔ امریکی صدر ڈونلڈ ٹرمپ نے امریکیوں سے اپنا الوداعی خطاب کرتے ہوئے کہا ہے کہ ہم نے وہی کیا، جو ہم کرنے آئے تھے۔ ڈونلڈ ٹرمپ نے امریکیوں سے بحیثیت امریکی صدر اپنا الوداعی خطاب بذریعہ یوٹیوب کیا ہے۔ انہوں نے اپنے ویڈیو پیغام میں کہا ہے کہ فخر ہے کہ میں دہائیوں میں وہ پہلا صدر ہوں، جس نے کوئی نئی جنگیں شروع نہیں کیں۔ ڈونلڈ ٹرمپ کا مزید کہنا ہے کہ میں نے اپنے دورِ صدارت میں مشکل اور سخت ترین لڑائیوں کا انتخاب کیا کہ آپ نے مجھے اسی لیے منتخب کیا تھا۔ امریکی صدر نے الوداعی خطاب میں یہ بھی کہا ہے کہ اب ملک کو درپیش سب سے بڑا خطرہ ہماری قومی عظمت سے اعتماد کے ضیاع کا ہے۔