مریم نواز کل الیکشن کمیشن کے سامنے جھوٹ بول کر چلتی بنیں، فرخ حبیب

اسلام ٹائمز۔ پاکستان تحریک انصاف کے رہنما اور رکن قومی اسمبلی فرخ حبیب نے اسلام آباد میں میڈیا سے گفتگو کرتے ہوئے کہا ہے کہ پیپلز پارٹی اور نون لیگ کے اکاؤنٹس کی سکرونٹی کا عمل جاری ہے، گزشتہ پانچ سال کے اکاؤنٹس کی جانچ پڑتال ہوگی، مریم نواز کل جھوٹ بول کر چلتی بنیں، اب تمام جماعتوں کو پارٹی فنڈنگ کا حساب دینا ہوگا۔ الیکشن کمیشن کے باہر پی ٹی آئی رہنما فرخ حبیب نے میڈیا سے گفتگو کرتے ہوئے کہا کہ الیکشن کمیشن نے 19 جماعتوں کو نوٹس جاری کیے، پی ٹی آئی کی درخواست پر آج نوٹسز جاری ہوئے، سیاسی جماعتوں نے اثاثوں اور آمدن کے ذرائع بتانے ہیں۔

انکا کہنا تھا کہ یہ اتنے ڈھیٹ ہو چکے ہیں کہ انہیں شرم بھی نہیں آتی، پی ڈی ایم کل اپنی یادداشت الیکشن کمیشن جمع کرانا بھول گئی۔ فرخ حبیب کا کہنا تھا کہ الیکشن کمیشن کو تمام ریکارڈ فراہم کر دیا، اپوزیشن ہمارے ریکارڈ کا 10 فیصد حصہ ہی لے آئے، پیپلزپارٹی اور مسلم لیگ نون نے تو ابھی کچھ جمع نہیں کرایا۔ انہوں نے کہا کہ مریم نواز کے جھوٹ کی ہنڈیا بیچ چوراہے پھوٹ چکی، مریم بی بی جرات کرے اپنے جھوٹ پر قوم سے معافی مانگے، اداروں کو قانون مضبوط بناتا ہے، جب فیصلے آئیں گے فیصلوں کی طاقت خود بولے گی۔