پاک جنوبی افریقہ کرکٹ سیریز، نیشنل اسٹیڈیم کے راستے 5 دن بند

اسلام ٹائمز۔ شہر قائد کے نیشنل اسٹیڈیم میں پاکستان اور جنوبی افریقہ کے مابین ٹیسٹ میچ کے ایام کیلئے ٹریفک پولیس نے خصوصی ٹریفک پلان ترتیب دیدیا ہے۔ ٹریفک پلان کے مطابق میچ کے انعقاد کے دنوں میں صبح 9 بجے سے شام 6 بجے تک مختلف علاقوں سے نیشنل اسٹیڈیم کی طرف آنے جانے والی مختلف شاہراہوں پر ٹریفک مکمل بند رہے گی۔ جنوبی افریقہ کیخلاف سیریز، نیشنل اسٹیڈیم کے راستے 5 دن بند رہیں گے۔ اعلامیہ کے مطابق شاہ فیصل سے براستہ حبیب ابراہیم رحمت اللہ روڈ سے سرشاہ سلیمان روڈ پر نیشنل اسٹیڈیم کی طرف ٹریفک مکمل طور پر بند ہوگئی۔ عام طور پر یہ راستہ اختیار کرنے والے شہری میچ کے دورانیہ میں کارساز سے ڈرگ روڈ، شارع فیصل سے راشد منہاس روڈ، ملینیم نیپال کی طرف کا راستہ اختیار کریں گے۔ اسی طرح ائرپورٹ کی طرف جانے والے شہری بھی ڈرگ روڈ سے دائیں جانب راشد منہاس روڈ ملینیم اور نیپا پل کی طرف جا سکیں گے۔ راشد منہاس روڈ سے اسٹیڈیم براستہ ڈالمیا روڈ بھی ٹریفک کیلئے بند رہے گی۔ شہری ملینیم چوک سے نیپا پل یا شاہراہ فیصل کا راستہ اختیار کیا جاسکتا ہے۔

ترجمان ٹریفک پولیس کے مطابق لیاقت آباد سے براستہ حسن اسکوائر فلائی اوور نیشنل اسٹیڈیم عام پبلک کیلئے بند رہے گا۔ شہری یونیورسٹی روڈ کا راستہ اختیار کرکے منزل کی طرف جا سکیں گے۔ یونیورسٹی روڈ پر نیو ٹاؤن ٹرننگ سے اسٹیڈیم روڈ عام پبلک کیلئے بند ہوگی۔ نیو ٹاؤن چورنگی سے شہید ملت یا پی پی چورنگی کا راستہ اختیار کیا جا سکتا ہے۔ آغا خان اسپتال، لیاقت نیشنل ہسپتال اور اس علاقے کے رہائشی شہری بھی نیو ٹاؤن تھانے کی طرف سے راستہ اختیار کرسکیں گے۔ ٹریفک پولیس ترجمان کے مطابق سہراب روڈ سے نیپا، لیاقت آباد نمبر 10 حسن اسکوائر، یونیورسٹی روڈ سے ملینیم چوک اور نیوٹاؤن سے ہر قسم کی ہیوی ٹریفک کا داخلہ ممنوع ہوگا۔ پولیس ترجمان کے مطابق شہری کسی بھی مشکل کی صورتحال میں ٹریفک ہیلپ لائن 1915 پر کال کرکے معلومات لے سکتے ہیں۔