اسلام ٹائمز۔ موسم سرما میں پہلی بار دنیا کی دوسری بلند ترین چوٹی سر کرنے والی نیپالی ٹیم نے جی ایچ کیو کا دورہ کیا اور آرمی چیف جنرل قمر جاوید باجوہ سے ملاقات کی۔ آرمی چیف نے نیپالی ٹیم کو موسم سرما میں کے ٹو سر کرکے مہم جوئی کی تاریخ میں ریکارڈ بنانے پر مبارک باد دی۔ نیپالی ٹیم نے آرمی چیف کو کے ٹو پر مہم جوئی کے دوران اپنے تجربات سے آگاہ کیا اور کہا کہ جس طرح ان کا پاکستان میں استقبال اور مہمان نوازی کی گئی، وہ مثالی تھی۔ کوہ پیمائوں کی ٹیم نے تاریخی مہم جوئی کیلئے سہولیات فراہم کرنے پر شکریہ بھی ادا کیا۔