اسلام ٹائمز۔ امریکی وزارت خارجہ کی جانب سے اعلان کیا گیا ہے کہ موجودہ امریکی حکومت نے ڈونلڈ ٹرمپ کی جانب سے یمنی مزاحمتی تحریک انصاراللہ کو دہشتگرد قرار دیئے جانے کے فیصلے پر نظرثانی کا عمل شروع کر دیا ہے۔ بین الاقوامی خبررساں ایجنسی روئٹرز کے مطابق امریکی وزارت خارجہ کے ترجمان کا کہنا ہے کہ ٹرمپ حکومت کی جانب سے انصاراللہ یمن کو دہشتگرد تنظیم قرار دیئے جانے کے فیصلے پر نظرثانی کی جا رہی ہے تاکہ کم از کم وقت میں اس موضوع کا جائزہ لے کر کسی نتیجے پر پہنچا اور نئے فیصلے کا اعلان کیا جائے۔ واضح رہے کہ جو بائیڈن کے نامزد وزیر خارجہ اینٹونیو بلنکن نے چند روز قبل ہی اعلان کیا تھا کہ انصاراللہ یمن کے دہشتگرد تنظیموں کی فہرست میں شامل کئے جانے پر نظرثانی کی جائے گی۔