جماعت اسلامی نے ہمیشہ اتحاد اور فرقہ وارانہ ہم آہنگی کیلئے کردار ادا کیا ہے، لیاقت بلوچ

اسلام ٹائمز۔ نائب امیر جماعت اسلامی پاکستان لیاقت بلوچ کی جانب سے جمعیت اتحاد العلماء لاہور کے ذمہ داران کے اعزاز میں ناشتے کا اہتمام کیا گیا۔ مسلم ٹاؤن میں منعقدہ ناشتہ کی تقریب میں ڈپٹی سیکرٹری جماعت اسلامی لاہور احمد سلمان بلوچ، صدر لاہور جمعیت اتحاد العلماء مولانا مختار سواتی، قاری عطاالرحمن، مفتی عمر یونس، قاری عبدالوارث، مفتی بابر جمال، مفتی نوید احمد زبیری، قاری عبدالرحمن، قاری ناظر حسین شاکر، مولانا عبدالمالک حیات، قاری غلام یاسین، حافظ سبیل احمد، قاری سلیم، قاری تاج اور مولانا یحییٰ فاروقی نے شرکت کی۔

اس موقع پر نائب امیر جماعت اسلامی لیاقت بلوچ کا کہنا تھا کہ ناشتہ تو مل بیٹھنے کا ایک بہانہ ہے، جمیعت اتحاد العلماء کے ذمہ داران وحدت کے فروغ کیلئے نمایاں خدمات سرانجام دے رہے ہیں۔ انہوں نے کہا کہ جماعت اسلامی نے ہمیشہ اتحاد اور فرقہ وارانہ ہم آہنگی کیلئے کردار ادا کیا ہے اور وحدت و اخوت کیلئے کام کرنیوالوں کو حوصلہ افزائی کی ہے۔ لیاقت بلوچ کا کہنا تھا کہ جمعیت اتحاد العلماء ہو یا ملی یکجہتی کونسل، ہم نے ہر پلیٹ فارم پر اتحاد کے فروغ کی کوششوں کو سراہا ہے۔ اس موقع پر بہترین کارکردگی پر علماء کو شیلڈز بھی دی گئیں۔