انہوں نے کہا کہ مجھے ممکنہ طور پر حیاتیاتی ہتھیاروں کے بارے میں کہنا چاہیئے، وہ بہت بڑی چیز ہے، ہمیں اس قسم کی ٹیکنالوجی کی ضرورت نہیں۔ ماضی میں بھی بل گیٹس کہہ چکے ہیں کہ بائیو ٹیررازم ایک بڑا خطرہ ہے اور انسانیت کے لیے بہت بڑا سانحہ ثابت ہوسکتا ہے۔ وال اسٹریٹ جرنل کے ساتھ سی این بی سی کو بھی بل گیٹس نے ایک انٹرویو دیا۔ اس انٹرویو میں بل گیٹس سے کرپٹو کرنسی کے بارے میں موسمیاتی تبدیلی کے تناظر میں سوال پوچھا گیا، کیونکہ یہ ڈیجیٹل کرنسیاں بہت زیادہ توانائی استعمال کرتی ہیں۔ تاہم اس موقع پر بل گیٹس نے کہا کہ بٹ کوائن کے حوالے سے ان کا مؤقف غیرجانبدارانہ ہے۔

انہوں نے کہا میرے پاس بٹ کوائن نہیں اور اس حوالے سے میرا نکتہ نظر غیرجانبدارانہ ہے۔ انہوں نے مزید کہا کہ بٹ کوائن اوپر اور نیچے جاسکتے ہیں کیونکہ اس کا انحصار کرنسی کے حوالے سے لوگوں کے خیالات پر ہے اور میں پیششگوئی نہیں کرسکتا کہ یہ کس طرح پیشرفت کرے گی۔ انہوں نے بتایا کہ گیٹس فاؤنڈیشن کی جانب سے رقم کو ڈیجیٹل فارم میں منتقل کرنے پر کام کیا جا رہا ہے، کیونکہ اس سے ترقی پذیر ممالک میں اخراجات کو کم کیا جاسکتا ہے، مگر ایسا عملی وجوہات کی وجہ سے کیا جائے گا۔ بل گیٹس نے کہا کہ اس سے ہم ٹرانزیکشنز کو ریورس بھی کرسکیں گے، آپ کو معلوم ہوسکے گا کہ فنڈز کے ساتھ کیا ہو رہا ہے، یہ ٹیکس سے بچنے یا غیر قانونی سرگرمی نہیں۔

خیال رہے کہ دنیا کے امیر ترین شخص ایلون مسک کی کمپنی ٹیسلا نے حال ہی میں اعلان کیا تھا کہ اس کی جانب سے بٹ کوائن میں ڈیڑھ ارب ڈالرز کی سرمایہ کاری کی گئی ہے، جس کے بعد ڈیجیٹل کرنسی کی قیمت میں ریکارڈ اضافہ دیکھنے میں آیا۔ دلچسپ بات یہ ہے کہ بل گیٹس نے ایک انٹرویو میں ایلون مسک کو سراہا بھی تھا۔ انہوں نے کہا کہ ایلون مسک نے ٹیسلا کے ساتھ جو کیا وہ زبردست ہے، ان کی کوششوں سے ثابت ہوا کہ الیکٹرک گاڑیاں بھی موسمیاتی تبدیلیوں کے مسئلے کی روک تھام کا ایک حصہ ہوسکتی ہیں، ہمیں بہت سارے ایلون مسکس کی ضرورت ہے، انہیں اپنی کوششوں پر فخر ہونا چاہیئے۔