لاپتہ افراد کے معاملے پر بننے والے کمیشن نے بہت پیشرفت کی ہے، ترجمان پاک فوج

اسلام ٹائمز۔ پاک فوج کے ترجمان میجر جنرل بابر افتخار نے جبری طور پر لاپتہ افراد کے حوالے سے سوال پر کہا کہ لاپتہ افراد کے معاملے پر بننے والے کمیشن نے بہت پیشرفت کی ہے۔ انہوں نے کہا کہ اس کمیشن کے پاس 6 ہزار سے زائد افراد کے گمشدہ ہونے کے مقدمات تھے، جن میں سے 4 ہزار حل کیے جا چکے ہیں جبکہ یہ معاملہ بہت جلد حل ہو جائے گا۔ واضح رہے کہ حال ہی میں بلوچستان سے تعلق رکھنے والے چند لاپتہ افراد کے اہل خانہ نے اسلام آباد میں اپنا دھرنا کئی روز جاری رکھنے کے بعد ختم کیا ہے۔ لاپتہ افراد کے اہل خانہ نے یہ دھرنا وزیر انسانی حقوق ڈاکٹر شیریں مزاری کی اس یقین دہانی کے بعد ختم کیا کہ اگلے ماہ وزیراعظم عمران خان ان سے ملاقات کریں گے اور ان کے مسائل حل کرنے کی کوشش کریں گے۔