اسلام ٹائمز - ماسک کے بغیر کوئی اہلکار ڈیوٹی نہ کرے، آئی جی پنجاب

ماسک کے بغیر کوئی اہلکار ڈیوٹی نہ کرے، آئی جی پنجاب

آئی جی پنجاب انعام غنی نے کہا ہے کہ ماسک وردی کا حصہ ہے بغیر ماسک کوئی اہلکار ڈیوٹی نہ کرے۔

اسلام ٹائمز۔ پنجاب کے شہر سرگودھا میں کورونا مریضوں میں مسلسل اضافے سے سبب 6 علاقوں میں لاک ڈاؤن کر دیا گیا، ملتان کے ضلع بھر میں بھی 15 روزہ لاک ڈاؤن کیا گیا ہے، آئی جی پنجاب انعام غنی نے کہا ہے کہ ماسک وردی کا حصہ ہے بغیر ماسک کوئی اہلکار ڈیوٹی نہ کرے۔ ترجمان ضلعی انتظامیہ ملتان کے مطابق 28 مارچ تک تعلیمی ادارے، شادی ہالز، پارکس، سینیما، تھیٹرز اور درگاہیں بند رہیں گی، گوشت، سبزی، پھل، کریانہ اسٹور صبح 7 سے رات 9 بجے تک کھلے رہیں گے۔ ضلعی انتظامیہ نے کہا ہے کہ لاک ڈاؤن میں تمام تجارتی مراکز کو شام 6 بجے بند کر دیا جائے گا،میڈیکل اسٹور، کلینکس، اسپتال، پیٹرول پمپس اور بیکری 24 گھنٹے کھلی رہے گی۔ ترجمان نے بتایا کہ ریسٹورنٹ میں بیٹھ کر کھانا کھانے پر پابندی ہو گی۔ ضلعی انتظامیہ سرگودھا کے فوکل پرسن سکندرحیات نے کہا کہ شہر کے 6 علاقوں میں لاک ڈاؤن کردیا گیا ہے،نیوسیٹیلائٹ ٹاؤن زیڈ بلاک، فاروق کالونی اور یونیورسٹی روڈ کے علاوہ اقبال کالونی بلاک 3 اور 4 کے کچھ علاقوں کو لاک ڈاؤن کیا گیا ہے۔