ایم کیو ایم لندن کی ٹارگٹ کلنگ ٹیم چلانیوالی کہکشاں حیدر کی ایک اور آڈیو منظر عام پر آگئی

اسلام ٹائمز۔ ایم کیو ایم لندن گروپ کی ٹارگٹ کلنگ ٹیم چلانے والی کہکشاں حیدر کی ایک اور آڈیو منظر عام پر آگئی، جس میں وہ ٹارگٹ کلر کو ہدایت دے رہی ہے کہ فجر میں کام نہیں کرنا، دوپہر یا مغرب کے وقت کام کریں۔ تفصیلات کے مطابق ایم کیو ایم لندن کی ٹارگٹ کلنگ ٹیم چلانے والی کہکشاں کی ایک اور آڈیو سامنے آگئی، جس میں کہکشاں حیدر ٹارگٹ کلر کو ٹارگٹ کو نشانہ بنانے کی ہدایت کر رہی ہے۔ آڈیو میں کہکشاں نے سرینا مارکیٹ کے قریب جامعہ مسجد کے پیش امام کو نشانہ بنانے کی بات کرتے ہوئے کہا پیش امام وہی قریب میں رہتے ہیں، واک کرکے مسجد آتے ہیں اور واک کرکے جاتے ہیں۔

ایم کیو ایم لندن کی رکن نے ٹارگٹ کلر کو ہدایت دی کہ فجر میں کام نہیں کرنا، فجر میں سناٹا ہوتا ہے، فجر میں سناٹے کی وجہ سے دور سے ہی پتہ چلتا ہے کہ گاڑی آرہی ہے یا بائیک آرہی ہے۔ کہکشاں حیدر نے ہدایت دیتے ہوئے کہا کہ دوپہر یا مغرب کے وقت کام کریں، جب ٹریفک چل رہا ہو، ایسے وقت میں انسان ٹریفک میں گھس کر نکل جاتا ہے۔