طلال چوہدری کے ٹوئٹ کا پارٹی سے کوئی تعلق نہیں، محمد زبیر
24 Mar 2021 06:35
نواز شریف اور مریم نواز کے ترجمان نے مزید کہا کہ لانگ مارچ کی تیاری پیپلز پارٹی نے ہم پر چھوڑی تھی اگر پی پی اپوزیشن اتحاد سے الگ ہوتی ہے تو اُسے کچھ بھی حاصل نہیں ہوگا۔
اسلام ٹائمز۔ اپوزیشن اتحاد (پی ڈی ایم) کی بڑی جماعت پاکستان مسلم لیگ (ن) نے اپنے جماعت کے رہنما طلال چوہدری کے بلاول بھٹو سے متعلق ٹوئٹ سے لاتعلقی کا اعلان کردیا ہے۔ سابق وزیرِاعظم نواز شریف اور ان کی صاحبزادی مریم نواز کے ترجمان محمد زبیر نے کہا ہے کہ طلال چوہدری کے ٹوئٹ کا پارٹی سے کوئی تعلق نہیں۔ نجی ٹی وی سے محمد زبیر نے کہا کہ طلال چوہدری نے سینئر لیڈر شپ سے پوچھ کر ٹوئٹ نہیں کیا تھا۔
انہوں نے کہا کہ میرا نہیں خیال کہ پیپلز پارٹی پی ڈی ایم سے آؤٹ ہوگی یا عمران خان پی پی سے ہاتھ ملائیں گے۔ نواز شریف اور مریم نواز کے ترجمان نے مزید کہا کہ لانگ مارچ کی تیاری پیپلز پارٹی نے ہم پر چھوڑی تھی اگر پی پی اپوزیشن اتحاد سے الگ ہوتی ہے تو اُسے کچھ بھی حاصل نہیں ہوگا۔
خبر کا کوڈ: 923126