کورونا ایس او پیز کی خلاف ورزی، 38 دکاندار، 7 شادی ہالز کے منیجرز گرفتار

اسلام ٹائمز۔ پشاور میں کورونا ایس او پیز کی خلاف ورزی پر 7 شادی ہالز کے منیجرز کو گرفتار کرلیا گیا۔ پشاور میں ضلعی انتظامیہ نے کورونا ضابطہ اخلاق کی خلاف ورزی، ماسک استعمال نہ کرنے پر 38 دکانداروں کو گرفتار کرکے 29 دکانوں کو سیل کر دیا۔ کورونا ضابطہ اخلاق کی مسلسل خلاف ورزی پر دیوان حیات شادی ہال، مون شادی ہال، البائک شادی ہال، مون گیدرنگ سمیت 7 شادی ہالز کے منیجرزکو گرفتار کر لیا گیا، جب کہ بی آر ٹی سٹیشنوں و لوکل ٹرانسپورٹ میں سیفٹی ماسک استعمال نہ کرتے ہوئے 131 افراد کو جرمانہ کیا گیا۔ ڈپٹی کمشنر پشاور کیپٹن (ر) خالد محمو د کے مطابق صوبائی دارالحکومت پشاور میں کورونا ضابطہ اخلاق کی خلاف ورزی پر کریک ڈاؤن جاری ہے اور صوبائی حکومت کے احکامات پر کارروائیاں جاری رہیں گی جبکہ حکومتی ضابطہ اخلاق پر عمل درآمد پر ہر صورت ممکن بنایا جائے گا۔ انہوں نے تاجر برادری اور عوام سے اپیل کی کہ بازاروں میں رش نہ بنائیں اور حکومتی ضابطہ اخلاق پر عمل درآمد کریں بصورت دیگر قانونی کارروائی عمل میں لائی جائے گی۔