آئی ایس او کراچی کے تحت مرکزی شب دعا کا عظیم الشان اجتماع

اسلام ٹائمز۔ امامیہ اسٹوڈنٹس آرگنائزیشن پاکستان کراچی ڈویژن کے زیراہتمام ولادت باسعادت حضرت امام مہدی علیہ السلام اور شبِ برأت کے موقع پر مرکزی شبِ دعا کا اجتماع بعنوان یوم مستضعفین جہاں نیٹی جیٹی پل (نزد PNSC بلڈنگ) پر ہوا۔ بین الاقوامی شہرت یافتہ قاری و آئی ایس او کوئٹہ ڈویژن کے نائب صدر قاری سجاد نے تلاوت کلام پاک سے پروگرام کا آغاز کیا۔ دعائے کمیل کی تلاوت مولانا رضا جان کاظمی نے کی، شرکاء سے خطاب مولانا صادق رضا تقوی اور مولانا اعجاز حسین بہشتی نے کیا، جبکہ عالمی شہرت یافتہ سلیم مستان، دستہ امامیہ کے مرکزی صاحب بیاض عاطر حیدر اور جری حیدر، ناصر اور عون نے نعت و منقبت پیش کی۔

مولانا صادق رضا تقوی نے خطاب کرتے ہوئے کہا کہ شعبان کا مہینہ ان شخصیات کی ولادت رکھتا ہے، جنہوں نے سرِ کربلا سب کچھ قربان کرکے دین خدا، دینِ مبین، شریعت محمدی کی روح کو قائم رکھا، یہ مہینہ اسلامی تاریخ اور فلسفہ کے مطابق اپنی ایک واضح اہمیت کا حامل ہے، نیمہ شعبان کی رات نہ صرف ایک فرقے کیلئے اہمیت رکھتی ہے، بلکہ عالم اسلام سے منسوب ہر مسلمان کیلئے افادیت رکھتی ہے، یہ رات، ماہِ رمضان المبارک کی تیاری اور خود سازی کا اہم پہلو رکھتی ہے، ماہ شعبان میں مسلمان اپنے کردار اور اپنے آپ کو اس قدر بلند کرلے کہ جب ماہ خدا میں اللہ کا مہمان بنے تو زیادہ سے زیادہ نیکیاں حاصل کرسکے۔

مولانا اعجاز حسین بہشتی نے خطاب کرتے ہوئے کہا کہ امام مہدی علیہ السلام کا انتظار فقط ایک مسلک یا فرقہ نہیں بلکہ پوری کائنات کر رہی ہے، شبِ برأت نہ صرف گناہوں سے دوری کی رات ہے، بلکہ دراصل یوم مستضعفین جہاں ہے اور اس دن تمام دنیا کے مظلومین اپنے مسیحا کی خدمت میں استغاثہ پیش کرتے ہیں، یقیناً امام مہدی علیہ السلام ہی آکر اس دنیا سے ظلم و ستم کا خاتمہ کریں گے۔ مرکزی شب دعا میں آئی ایس او پاکستان کے مرکزی سینیئر نائب صدر علی اویس زیدی، جعفریہ الائنس پاکستان کے جنرل سیکرٹری سید شبر رضا، آئی ایس او کراچی ڈویژن کے صدر حسن عسکری سمیت کثیر تعداد میں مومنین و مومنات نے شرکت کی۔