QR CodeQR Code

جب سے تحریک انصاف کی حکومت آئی ہے عوام پر مہنگائی کا عذاب ہے، سعید غنی

31 Mar 2021 16:30

کراچی میں پریس کانفرنس کرتے ہوئے رہنما پی پی نے کہا کہ چھ ماہ پہلے حفیظ شیخ کو ایڈوائزر سے وزیر بنایا گیا، پہلے مہنگائی نہیں تھی، تاہم حفیظ شیخ کو ہٹانے کی بنیاد مہنگائی نہیں ہے، بلکہ حفیظ شیخ کو ہٹانے کا فیصلہ پی ڈی ایم کی جیت ہے۔


اسلام ٹائمز۔ وزیر تعلیم سندھ سعید غنی کا کہنا ہے کہ جب سے تحریک انصاف کی حکومت آئی ہے عوام پر مہنگائی کا عذاب ہے، اس عظیم حکومت نے حفیظ شیخ کو ایڈوائزر سے وزیر بنایا، مگر حفیظ شیخ کو ہٹانے کی وجہ مہنگائی نہیں ہے۔ کراچی میں رہنما پیپلز پارٹی کے ہمراہ پریس کانفرنس کرتے ہوئے وزیر تعلیم سندھ سعید غنی نے بتایا کہ ایم کیو ایم کے سابق ایم پی اے کورنگی سید وقار شاہ، شاہد خان سواتی، ہزارہ اسٹوڈنٹس سندھ کے صدر زاہد رشید خان و دیگر نے آج پیپلز پارٹی میں شمولیت اختیار کی ہے۔ سعید غنی نے بتایا کہ مختلف جماعتوں کے لوگوں کی بڑی تعداد میں پیپلز پارٹی میں شمولیت کا سلسلہ جاری ہے۔

انہوں نے کہا کہ پچھلی مرتبہ جب سینیٹ چیئرمین کے انتخابات ہوئے بلوچستان عوامی پارٹی (باپ) نہیں بنی تھی، پیپلز پارٹی کے سینیٹ میں 21 اراکین ہیں، 2 عوامی نیشنل پارٹی کے تھے، ایک جماعت اسلامی اور 2 فاٹا اراکین یوسف رضا گیلانی کے ساتھ تھے۔ سعید غنی نے کہا کہ چھ ماہ پہلے حفیظ شیخ کو ایڈوائزر سے وزیر بنایا گیا، پہلے مہنگائی نہیں تھی، تاہم حفیظ شیخ کو ہٹانے کی بنیاد مہنگائی نہیں ہے، بلکہ حفیظ شیخ کو ہٹانے کا فیصلہ پی ڈی ایم کی جیت ہے۔ ان کا مزید کہنا تھا سینیٹ کے الیکشن میں، میں نے کہا تھا کہ ہم ووٹ سب سے مانگیں گے۔


خبر کا کوڈ: 924475

خبر کا ایڈریس :
https://www.islamtimes.org/ur/news/924475/جب-سے-تحریک-انصاف-کی-حکومت-ا-ئی-ہے-عوام-پر-مہنگائی-کا-عذاب-سعید-غنی

اسلام ٹائمز
  https://www.islamtimes.org