QR Code

سابق حکمرانوں نے صوبے کے عوام کی ترجیحات کو نظر انداز کر کے نمائشی منصوبے شروع کئے، ضیاء لانگو

13 Apr 2021 20:33

عوامی نمائندوں سے ملاقات میں وزیر داخلہ بلوچستان کا کہنا تھا کہ حلقوں میں عوامی ضروریات اور ترجیحات کو مدنظر رکھ کر ترقیاتی منصوبے شروع کریں گے۔ مخصوص شہروں پر فوکس کرنا ترقی نہیں بلکہ پسماندہ علاقوں کی حق تلفی ہے۔ انہوں نے کہاکہ بلوچستان عوامی پارٹی کی حکومت ترقی کے سفر کو دور دراز علاقوں میں لے کر گئی ہے۔

اسلام ٹائمز۔ صوبائی وزیر داخلہ میر ضیاء اللہ لانگو سے وزیر داخلہ آفس میں مختلف اضلاع سے تعلق رکھنے والے عوامی نمائندوں نے ملاقاتیں کیں، جس میں مختلف حلقوں کے مسائل کے حل کے حوالے سے بات چیت ہوئی۔ عوامی نمائندوں نے وزیر داخلہ میر ضیاء کو حلقوں میں جاری ترقیاتی سکیموں پر ہونے والی پیشرفت سے آگاہ کیا۔ وزیر داخلہ نے اس موقع پر گفتگو کرتے ہوئے کہاکہ ہر ضلع کا علیحدہ ڈویلپمنٹ پیکیج کررہے ہیں۔ منتخب نمائندوں کے حلقوں میں ترجیحی بنیادوں پر ترقیاتی کام ہوں گے۔ حلقوں میں عوامی ضروریات اور ترجیحات کو مدنظر رکھ کر ترقیاتی منصوبے شروع کریں گے۔ مخصوص شہروں پر فوکس کرنا ترقی نہیں بلکہ پسماندہ علاقوں کی حق تلفی ہے۔ انہوں نے کہاکہ بلوچستان عوامی پارٹی کی حکومت ترقی کے سفر کو دور دراز علاقوں میں لے کر گئی ہے۔ سابق حکمرانوں نے اپنے دور میں صوبے کے عوام کی ترجیحات کو نظر انداز کر کے نمائشی منصوبے شروع کئے۔

شوبازی والے منصوبے’’سفید ہاتھی‘‘ بن کر خزانے پر بوجھ بنے۔ عوام کے خون پسینے کی کمائی کو بے دریغ ذاتی پسند و ناپسند پر ضائع کیا گیا ہے۔ انہوں نے کہا کہ سابق حکمرانوں نے عوام کو بنیادی سہولتیں فراہم کرنے پر کوئی توجہ نہ دی جبکہ بلوچستان عوامی پارٹی کی حکومت یکساں ترقی پر عمل پیرا ہے۔ نظر انداز علاقوں میں پہلی بار ترقیاتی کام ہو رہے ہیں۔ عوامی نمائندوں کو ہمیشہ مشاورت میں شامل کیا ہے۔ ون مین شو کا قائل نہیں، ٹیم ورک پر یقین رکھتا ہوں۔ عوام کی خدمت ہی اصل سیاست ہے۔ عوام کے مسائل کے حل کیلئے ہر علاقے کا دورہ کر رہا ہوں۔
 

خبر کا کوڈ: 926982