کشیدہ صورتحال، لاہور میں چھٹے روز بھی موبائل فون، انٹرنیٹ سروس متاثر

اسلام ٹائمز۔ لاہور میں ملتان روڈ پر کشیدہ صورتحال کے باعث شہر کے مختلف مقامات پر چھٹے روز بھی موبائل فون اور انٹرنیٹ سروسز بند ہیں۔ یتیم خانہ چوک کے اطراف میں 10 کلومیٹر کے ایریا میں، شاہدرہ سے ٹھوکر نیاز بیگ تک، بند روڈ سے گلبرگ تک انٹر نیٹ سروسز معطل ہے۔ سمن آباد، شادمان، فیصل ٹاؤن، اچھرہ، مزنگ، ساندہ، جیل روڈ، مال روڈ، سبزہ زار کے علاقوں میں بھی انٹرنیٹ سروسز متاثر ہیں۔ انٹرنیٹ کی بندش سے شہریوں کو مشکلات کا سامنا کرنا پڑ رہا ہے جبکہ طلبہ و طالبات کی آن لائن کلاسز بھی بری طرح متاثر ہو رہی ہیں۔ شہریوں کا کہنا ہے کہ انٹرنیٹ سروس متاثر ہونے سے ان کے کاروباری معاملات بھی متاثر ہو رہے ہیں۔ شہریوں نے فوری طور پر انٹرنیٹ سروس بحال کرنے کا مطالبہ کیا ہے۔