اسلام ٹائمز - کالعدم تحریک لبیک کے سربراہ کی رہائی کھٹائی میں پڑ گئی

کالعدم تحریک لبیک کے سربراہ کی رہائی کھٹائی میں پڑ گئی

ملتان روڈ پر دھرنا ختم، کارکنوں نے قومی اسمبلی میں قرارداد پیش ہونے پر سڑک کھول دی

محکمہ داخلہ کی ہدایات کے بعد پولیس اور محکمہ جیل خانہ جات نے نامزد ملزمان کی رہائی کا عمل روک دیا ہے۔ ذرائع کا کہنا ہے کہ کالعدم تحریک لبیک کے سربراہ حافظ سعد رضوی کیخلاف دو نامزد مقدمات ہیں۔ یہی وجہ ہے کہ انکی رہائی تاحال عمل میں نہیں لائی گئی۔

اسلام ٹائمز۔ کالعدم تحریک لبیک پاکستان کے سربراہ حافظ سعد رضوی کی رہائی کھٹائی میں پڑ گئی۔ ذرائع کے مطابق محکمہ داخلہ نے احکامات جاری کئے ہیں کہ جن کارکنوں کے خلاف نامزد مقدمات ہیں، انہیں رہا نہ کیا جائے۔ محکمہ داخلہ کی ہدایات کے بعد پولیس اور محکمہ جیل خانہ جات نے نامزد ملزمان کی رہائی کا عمل روک دیا ہے۔ ذرائع کا کہنا ہے کہ کالعدم تحریک لبیک کے سربراہ حافظ سعد رضوی کیخلاف دو نامزد مقدمات ہیں۔ یہی وجہ ہے کہ ان کی رہائی تاحال عمل میں نہیں لائی گئی۔

ادھر جیل حکام کا کہنا ہے کہ ہمیں سعد رضوی کے رہائی کے حوالے سے کوئی احکامات نہیں ملے۔ دوسری جانب چوک یتیم خانہ میں جاری دھرنا ختم کر دیا گیا ہے اور ملتان روڈ کو دونوں اطراف سے کھول دیا گیا ہے۔ روڈ کھولنے کا اعلان تحریک لبیک کی مجلس شوریٰ کے رکن مولانا غلام عباس فیضی نے کیا۔ انہوں نے کہا کہ قومی اسمبلی میں قرارداد جمع کروا دی گئی ہے اور یہ ہمارا مطالبہ تھا، اس لئے کارکن فوری طور پر دونوں اطراف کی سڑکیں خالی کر دیں۔