اسلام ٹائمز۔ یمنی میڈیا نے اطلاع دی ہے کہ یمن میں جارح سعودی عرب کا ایک جنگی بحری بیڑہ آگ لگنے سے تباہ ہو گیا ہے۔ عرب ای مجلے
الخبر الیمنی کے مطابق یمن کے مشرقی صوبے المہرہ کی بندرگاہ نشطون پر لنگر انداز ایک سعودی جنگی بحری بیڑے میں اچانک آگ بھڑک اٹھی جس کے باعث وہ مکمل طور پر جل کر تباہ ہو گیا ہے۔ مقامی میڈیا کے مطابق جارح سعودی عرب کے مذکورہ جنگی بحری بیڑے کے آگ کی لپیٹ میں چلے جانے سے چند گھنٹے قبل ہی اس کے ذریعے سمندر سے 3 ٹن منشیات برآمد کی گئی تھی جس کے باعث اب صوبہ المہرہ کے ریاض مخالف قبائل میں ممکنہ سعودی ردعمل کے باعث خوف کی لہر دوڑ گئی ہے۔ الخبر الیمنی کا لکھنا ہے کہ صوبہ المہرہ کے قبائل کے خوف و ہراس کی اصلی وجہ یہ ہے کہ وہ جانتے ہیں کہ سعودی عرب کا ردعمل صرف اس صوبے کے ریاض مخالف عناصر کو گھٹنے ٹیکنے پر مجبور کرنا ہی نہیں ہو گا بلکہ اس مرتبہ سعودی عرب "عیسی بن عفراز" کی سربراہی میں پورے صوبے پر اپنے وفادار جنگجوؤں کو مسلط کر دے گا۔