عمران خان کی عوام دشمن پالیسیوں کو کراچی کے عوام نے رد کردیا، قادر مندوخیل

اسلام ٹائمز۔ پاکستان پیپلز پارٹی کے فتح یاب ایم این اے عبدالقادر مندوخیل کا کہنا ہے کہ عمران خان کی عوام دشمن پالیسیوں کو کل کراچی کی عوام نے رد کردیا، ثابت ہوگیا لیاری سمیت پورے ملک میں 18 جولائی 2018ء کو ووٹ چوری کئے گئے۔ قادر مندوخیل نے پاکستان تحریک انصاف ارکان کی پریس کانفرنس پر ردعمل دیتے ہوئے کہا ہے کہ عمران خان کے جھوٹ اور قول و فعل میں تضاد کل کی شکست کا واضح ثبوت ہے۔ انہوں نے کہا کہ ثابت ہوگیا پی ٹی آئی نے حلقہ این سے 249 میں خود ساختہ سروے کروائے، اداروں کے تقدس کی بات کرنے والے ڈھائی سال سے اداروں پر حملہ آور ہیں، پی ٹی آئی ارکان نے پریس کانفرنس میں خود شکست تسلیم کی ہے۔

قادر مندوخیل نے کہا ہے کہ 50، 50 کروڑ سرکاری ایم این ایز کو دینے کا اعلان کرنے والے پی پی پی پر ووٹ خریدنے کا الزام لگا رہے ہیں۔ اُن کا کہنا تھا کہ سندھ دشمن جماعت پی ٹی آئی کو کل این اے 249 نے خالی ہاتھ گھر بھیج دیا، این اے 249 منی پاکستان ہے جس نے کل عمران خان اور اس کی عوام دشمن پالیسیوں کو رد کردیا۔