پشاور، ٹول پلازہ پر شہری نے روکنے پر پولیس اہلکار کو کچل ڈالا

اسلام ٹائمز۔ پشاور میں ٹول پلازہ پر شہری نے رکنے کا اشارہ کرنے پر پولیس اہلکار کو کچل ڈالا۔ تفصیلات کے مطابق پولیس کا کہنا ہے کہ پشاور موٹروے پولیس نے مردان کے پاس گاڑی کو روکنے کی کوشش کی تھی، ڈرائیور نے رکنے کے بجائے اہلکار پر گاڑی چڑھا دی۔ پولیس حکام کے مطابق گاڑی اسلام آباد سے پشاور آرہی تھی، ڈرائیور کو چمکنی پولیس نے گرفتار کرلیا، 26 سالہ ملزم جنید اسلام آباد کا رہائشی ہے۔ ذرائع کے مطابق موٹروے پولیس اہلکار ایل آر ایچ اسپتال میں زیر علاج ہے جہاں اس کی حالت تشویش ناک بتائی جارہی ہے۔

ملزم نے پولیس کو دئیے گئے بیان میں بتایا کہ حادثہ گاڑی کے بریک فیل ہونے کی وجہ سے ہوا ہے جبکہ موٹروے پولیس کنٹرول سے حاصل کردہ معلومات کے مطابق گاڑی 160 کلو میٹر فی گھنٹہ کی رفتار سے جارہی تھی جس کو روکنے کی کوشش کی تو ڈرائیور نے اہلکار پر گاڑی چڑھا دی۔ اے ایس پی چمکنی کا کہنا ہے کہ موٹروے پولیس کے مراسلے کے بعد واقعے کی ایف آئی آر درج ہوگی۔