QR Code

سعودی عرب اور یو اے ای مدد نہ کرتے تو پاکستان دیوالیہ ہو جاتا، عمران خان

10 May 2021 03:19

جدہ میں روشن ڈیجیٹل اکاؤنٹ کی تقریب میں پاکستانی کمیونٹی سے خطاب کرتے ہوئے وزیراعظم نے کہا کہ سعودی عرب کی پاکستانی کمیونٹی کو بہت عرصے سے جانتا ہوں، ڈیڑھ سال سے اطلاعات موصول ہو رہی تھیں کہ یہاں کے اوورسیز پاکستانیوں کو سفارتخانہ درست خدمات فراہم نہیں کر رہا تھا، اس مسئلے کے حل کیلئے اقدامات اٹھائے ہیں۔

اسلام ٹائمز۔ وزیراعظم عمران خان نے کہا ہے کہ مشکل وقت میں اگر سعودی عرب اور متحدہ عرب امارات ہماری مدد نہ کرتے تو پاکستان دیوالیہ ہو جاتا، مشکل وقت سے نکل چکے، اب آگے روشن مستقبل نظر آرہا ہے۔ جدہ میں روشن ڈیجیٹل اکاؤنٹ کی تقریب میں پاکستانی کمیونٹی سے خطاب کرتے ہوئے وزیراعظم عمران خان نے کہا کہ سعودی عرب کی پاکستانی کمیونٹی کو بہت عرصے سے جانتا ہوں، ڈیڑھ سال سے اطلاعات موصول ہو رہی تھیں کہ یہاں کے اوورسیز پاکستانیوں کو سفارت خانہ درست خدمات فراہم نہیں کر رہا تھا، اس مسئلے کے حل کے لیے اقدامات اٹھائے ہیں۔ انہوں نے کہا کہ روشن ڈیجیٹل اکاؤنٹ کے نتائج ہماری سوچ سے بڑھ کر سامنے آئے، 90 لاکھ پاکستانیوں کو کسی بھی طرح ملک کا اثاثہ بنانے کے لیے کام کر رہے ہیں۔

وزیراعظم نے کہا کہ سعودی عرب ہمارے لیے بہت اہم ہے، سعودی عرب نے بڑے مشکل وقت میں پاکستان کو سپورٹ کیا، سعودی عرب ہمیشہ مشکل وقت میں ہمارے ساتھ کھڑا ہوا، مشکل وقت میں اگر دو ممالک متحدہ عرب امارات اور سعودی عرب ہماری مدد نہ کرتے تو ہم دیوالیہ ہو جاتے۔ عمران خان نے کہا کہ ہمارے ہمسایہ ممالک کی ایکسپورٹ گر رہی تھی تو پاکستان کی امپورٹ بڑھ رہی تھی، مشکل وقت سے نکل چکے، اب آگے بہت روشن مستقبل نظر آرہا ہے۔ انہوں نے کہا کہ پاکستان کے لیے فیصلہ کن وقت ہے، ایک طرف مافیا ہے، جو ’’اسٹیٹس کو‘‘ کو بچانے کے لیے سرگرم ہے جبکہ دوسری جانب دوسری طرف ہم ہیں اور ہمارے ساتھ عوام ہے، اب پاکستان میں تبدیلی کو کوئی روک نہیں سکتا۔

خبر کا کوڈ: 931742