اسکردو:
اسلام ٹائمز۔ انجمن امامیہ بلتستان کا ایک اہم اجلاس زیر صدارت صدر انجمن امامیہ بلتستان حجۃ الاسلام آغا سید محمد عباس رضوی منعقد ہوا، جس میں کثیر تعداد میں عہدیداروں نے شرکت کی۔ اجلاس میں حسب سابق امسال بھی جمعۃ الوداع کو امام خمینی رہ کے فرمان پر عمل کرتے ہوئے یوم القدس کے طور پر شایان شان طریقے سے منانے کا فیصلہ کیا گیا۔ اجلاس میں فیصلہ کیا گیا کہ انجمن امامیہ بلتستان کے زیر اہتمام القدس کی ریلی بعد از نماز جمعہ امامیہ عید گاہ سے برآمد ہو کر یادگار شہداء سکردو پر احتجاجی جلسے کی شکل اختیار کریگی، جس سے منتخب علماء کرام اپنی تقریروں میں بیت المقدس پر صیہونی قبضے اور ان کے مظلوم فلسطینیوں پر ڈھائے جانے والے مظالم کے بارے میں تفصیلی روشنی ڈالیں گے۔ اجلاس کے آخر میں مملکت خداداد پاکستان کی سلامتی کیلئے خصوصی دعائیں کی گئیں۔