ایم کیو ایم پاکستان نے کراچی اور حیدرآباد ‏کو ٹیکس فری زون قرار دینے کا مطالبہ کردیا

اسلام ٹائمز۔ متحدہ قومی موومنٹ پاکستان نے معاشی و اقتصادی حب کراچی اور سندھ کے دوسرے بڑے شہر حیدرآباد ‏کو ٹیکس فری زون قرار دینے کا مطالبہ کردیا۔ اس حوالے سے ایم کیو ایم پاکستان نے قرارداد قومی اسمبلی میں جمع کرا دی ہے جس میں ‏وفاقی حکومت سے مطالبہ کیا گیا ہے کہ کراچی اور حیدرآباد کو فی الفور ٹیکس فری زون قرار دیا ‏جائے۔ ‏ قرارداد اراکین قومی اسمبلی کی جانب سے قومی اسمبلی سیکریٹریٹ میں جمع کرائی گئی ہے۔ ‏قرارداد میں کہا گیا ہے کہ کراچی اور حیدرآباد کو آفت زدہ قرار دے کر تمام یوٹیلیٹی بلز معاف ‏کئے جائیں۔ ‏
ایم کیو ایم پاکستان کی جانب سے جمع شدہ قرارداد میں مطالبہ کیا گیا ہے کہ کراچی اور حیدرآباد سے ہر قسم کی ٹیکس وصولی بند کی جائے، ‏کراچی اور حیدرآباد کورونا وباء سے زیادہ متاثر ہیں، کاروبار اور تعلیمی ادارے بند ہیں، معاشی ‏حالات خراب ہونے کے باعث دونوں شہر معاشی طور پر غیر مستحکم ہورہے ہیں۔