اسلام ٹائمز - دہلی کی عوام کو فی الحال لاک ڈاؤن سے راحت نہیں ملے گی، اروند کیجریوال

دہلی کی عوام کو فی الحال لاک ڈاؤن سے راحت نہیں ملے گی، اروند کیجریوال

دہلی کے وزیراعلٰی نے کہا کہ ماہرین کے ساتھ بات کر کے یہ طے کیا گیا ہے کہ آئندہ لہر میں 37 ہزار کیسوں کا عروج مان کر تیاری شروع کی جائے۔

اسلام ٹائمز۔ دہلی کے وزیراعلٰی اروند کیجریوال نے لاک ڈاؤن کو مزید کچھ دنوں کے لئے بڑھانے کا اعلان کر دیا ہے۔ اس اعلان سے ان لوگوں کو کافی مایوسی ہوگئی جو لگاتار لاک ڈاؤن ختم کرنے کا مطالبہ کر رہے تھے۔ اروند کیجریوال نے اپنے بیان میں بتایا کہ دہلی میں آج کے بعد بھی لاک ڈاؤن جاری رہے گا، لیکن کافی رعایت دی جا رہی ہے۔ انہوں نے رعایتوں کے بارے میں بتاتے ہوئے کہا کہ پرائیویٹ دفاتر 50 فیصد صلاحیت کے ساتھ کھولے جا سکتے ہیں اور ضروری سامان کی دکانیں روزانہ کھلیں گی۔ علاوہ ازیں دہلی میٹرو 50 فیصد صلاحیت کے ساتھ شروع کی جا رہی ہے۔ انہوں نے یہ بھی بتایا کہ سرکاری دفاتر میں گروپ اے افسران 100 فیصد اور باقی اس کے نیچے والے 50 فیصد افسر کام کریں گے، ضروری خدمات میں 100 فیصد ملازمین کام کریں گے۔ اروند کیجریوال نے کہا کہ ماہرین کے ساتھ بات کر کے یہ طے کیا گیا ہے کہ آئندہ لہر میں 37 ہزار کیسوں کا عروج مان کر تیاری شروع کی جائے۔ انہوں نے کہا کہ 420 ٹن آکسیجن کی اسٹوریج صلاحیت تیار کی جا رہی ہے، 25 آکسیجن ٹینکر خریدے جا رہے ہیں اور 64 آکسیجن پلانٹ لگ رہے ہیں۔