QR Code

شہری افواہوں پہ کان دھرے بغیر ویکسین لگوائیں، ڈاکٹر یاسمین راشد

6 Jun 2021 22:20

لاہور میں میڈیا سے گفتگو کرتے ہوئے پنجاب کی وزیر صحت کا کہنا تھا کہ شریف برادران دس سال میں ایک اسپتال نہ بنا سکے، جہاں اپنا علاج کروا سکتے، علاج کے بہانے وہ باہر جانے کی کوشش کرتے ہیں۔ انہوں نے مزید کہا کہ آئندہ جمعے کو مساجد میں ویکسین پر خطبے ہونگے۔

اسلام ٹائمز۔ وزیرِ صحت پنجاب ڈاکٹر یاسمین راشد نے کہا ہے کہ شہری افواہوں پر کان نہ دھریں، کورونا ویکسین لگوائیں۔ لاہور میں میڈیا سے گفتگو میں وزیر صحت پنجاب نے کہا کہ ویکسین لگوانے والوں کو مختلف مراعات دینے پر غور کر رہے ہیں۔ انہوں نے کہا کہ صوبے کی 11 کروڑ میں سے کم از کم 50 فیصد کو ویکسین لگنا ضروری ہے، اس کا کوئی نقصان نہیں، نقصان ہوتا تو دنیا ویکسین نہ لگواتی۔ ڈاکٹر یاسمین راشد نے مزید کہا کہ رواں سال کے آخر تک 7 کروڑ لوگوں کو ویکسین لگانے کا ہدف ہے۔ اُن کا کہنا تھا کہ خانیوال میں کورونا مثبت کیسز کی شرح 8 اور وہاڑی میں 10 فیصد ہے، ان اضلاع میں صورتحال پریشان کن ہے۔

صوبائی وزیر صحت نے کہا کہ کورونا ضوابط اور پابندیاں برقرار ہیں، لاہور میں مثبت کیسز کی شرح 1 اعشاریہ 3 جبکہ پنجاب میں 2 فیصد پر آگئی ہے۔ انہوں نے کہا کہ گذشتہ 24 گھنٹے کے دوران 1 لاکھ 80 ہزار افراد کو ویکسین لگائی گئی، کورونا ویکسین کی کمی نہیں ہے۔ ایک سوال کے جواب میں انہوں نے کہا کہ شریف برادران دس سال میں ایک اسپتال نہ بنا سکے، جہاں اپنا علاج کروا سکتے، علاج کے بہانے وہ باہر جانے کی کوشش کرتے ہیں۔ ڈاکٹر یاسمین راشد نے کہا کہ آئندہ جمعے کو مساجد میں ویکسین پر خطبے ہوں گے، کورونا ایس او پیز اور پابندیاں برقرار ہیں۔ انہوں نے کہا کہ ہفتے اور اتوار کے دنوں میں مکمل لاک ڈاون کا سلسلہ برقرار ہے۔


 

خبر کا کوڈ: 936619