اسلام ٹائمز - ساتویں یوم تأسیس پر حشد الشعبی کیجانب سے پہلی عظیم فوجی پریڈ کا انعقاد

ساتویں یوم تأسیس پر حشد الشعبی کیجانب سے پہلی عظیم فوجی پریڈ کا انعقاد

آیت اللہ العظمی سید علی حسینی السیستانی کے فتوے پر وجود میں آنیوالی عراقی سرکاری افواج میں شامل عوامی مزاحمتی فورس حشد الشعبی نے اپنے ساتویں یوم تأسیس کی مناسبت سے دارالحکومت بغداد میں عظیم فوجی پریڈ کا اہتمام کیا جسمیں شریک حشد الشعبی کے چاق و چوبند دستوں نے آیت اللہ سید علی سیستانی کی قد آدم تصاویر بھی اپنے ہمراہ اٹھا رکھی تھیں۔

اسلام ٹائمز۔ عالیقدر مرجع تقلید آیت اللہ سید علی حسینی السیستانی کی جانب سے جاری ہونے والے فتوے پر داعش کے خلاف 13 جون 2014ء کے روز وجود میں آنے والی عراقی عوامی مزاحمتی فورس حشد الشعبی کی جانب سے آج اپنے 7ویں یوم تأسیس پر دارالحکومت بغداد میں عظیم فوجی پریڈ کا اہتمام کیا گیا۔ اسلامی مزاحمتی محاذ کے قریبی سوشل میڈیا چینلز نے حشد الشعبی کی فوجی پریڈ کی فوٹیج نشر کرتے ہوئے اعلان کیا ہے کہ آیت اللہ سید علی سیستانی کی جانب سے جہاد کفائی کا فتوی صادر ہو جانے کے بعد داعش سے مقابلے کے لئے اہل تشیع و اہل تسنن مسلمانوں سمیت تمام مذاہب سے تعلق رکھنے والے دسیوں لاکھ عراقی شہریوں نے حشد الشعبی میں رضاکارانہ طور پر حصہ لیا اور پھر عالمی استکباری طاقتوں کی کھلی حمایت میں عراق و شام پر مسلط عالمی دہشتگرد تنظیم داعش کو 3 سال کے قلیل عرصے میں ملک بھر سے نکال باہر کر دیا گیا۔