بغداد، امریکی فوج کے غیر قانونی اڈے کے اندر امریکی فوجی قافلے پر کامیاب حملہ، 4 امریکی ہلاک

اسلام ٹائمز۔ عراقی میڈیا نے دارالحکومت بغداد میں واقع امریکی فوج کے غیر قانونی اڈے کے اندر ایک امریکی لاجسٹک قافلے پر کامیاب حملے کی اطلاع دی ہے۔ عراقی مزاحمتی محاذ کے قریبی سوشل میڈیا چینل "صابرین نیوز" نے بھی اس حوالے سے لکھا ہے کہ دارالحکومت بغداد میں قابض امریکی فوج کا ایک اور لاجسٹک قافلہ سڑک کنارے نصب بم سے ٹکرا کر تباہ ہو گیا ہے۔ عراقی میڈیا نے ذرائع سے نقل کرتے ہوئے لکھا کہ یہ ایک انتہائی پیشہ ورانہ سکیورٹی آپریشن تھا جو عراقی مزاحمتی گروہوں کی جانب سے انجام دیا گیا ہے۔ صابرین نیوز نے مزید لکھا کہ نشانہ بنایا جانے والا امریکی فوجی قافلہ، بغداد ایئرپورٹ کے فوجی حصے میں واقع امریکی فوجیوں کی سکونت کے مقام پر وقوع پذیر ہونے والے زور دار دھماکے میں تباہ ہوا ہے۔

دوسری جانب قابض امریکی لاجسٹک قافلے کو امریکی فوجی اڈے کے اندر کامیابی کے ساتھ نشانہ بنائے جانے کے فورا بعد عراقی مزاحمتی گروہ "فصیل المقاومۃ الدولیۃ" کی جانب سے جاری ہونے والے ایک بیان میں اس حملے کی ذمہ داری قبول کر لی گئی۔ اس بیان میں عراقی قوم کو مخاطب کرتے ہوئے لکھا گیا ہے کہ تمہارے سپوتوں نے اللہ تعالی کی مدد سے آج رات ٹھیک 12 بجکر 23 منٹ پر، بغداد انٹرنیشنل ایئرپورٹ پر واقع قابض امریکیوں کے فوجی اڈے کے اندر پیشہ ورانہ مزاحمتی آپریشن انجام دیا ہے جس کے نتیجے میں امریکی فوجی اڈے "وکٹوریا پیلیس" و شہید محمد علاء ایئربیس کے درمیان واقع شاہراہ پر 4 سفید لینڈکروزر اور 2 فوجی گاڑیوں پر مشتمل ایک امریکی فوجی قافلے کو کامیابی کے ساتھ نشانہ بناتے ہوئے تباہ کر دیا گیا ہے جس سے لینڈکروزر گاڑیوں میں موجود 4 امریکی فوجی بھی ہلاک ہوئے ہیں۔