چینی صدر کیجانب سے نومنتخب ایرانی صدر کو مبارکباد کا پیغام

اسلام ٹائمز۔ چینی صدر شی جن پنگ نے آج نومنتخب ایرانی صدر آیت اللہ سید ابراہیم رئیسی کو بھاری اکثریت کے ساتھ عوامی انتخاب پر مبارکباد پیش کی ہے۔ چینی سرکاری خبررساں ایجنسی شینہوا کے مطابق شن جن پنگ نے اپنے پیغام میں آیت اللہ سید ابراہیم رئیسی کو اسلامی جمہوریہ ایران کے تیرہویں صدر منتخب ہونے پر مبارکباد پیش کرتے ہوئے تاکید کی ہے کہ چین و ایران دو انتہائی اہم شراکتدار ہیں جبکہ اس سال، دونوں ممالک کے درمیان سفارتی تعلقات کی استواری کی 50ویں سالگرہ منائی جائے گی۔ چینی صدر نے اپنے پیغام میں کہا کہ میں ایران و چین کے درمیان استوار دوستانہ تعلقات میں وسعت کو انتہائی اہم گردانتا ہوں اور تزویراتی و دوطرفہ تعلقات کی توسیع، متقابل سیاسی اعتماد کے استحکام اور دونوں ممالک و ان کی عوام کے مشترکہ مفاد کے حصول کے لئے مختلف میدانوں میں تعمیری تعاون کی توسیع کی خاطر میں نومنتخب ایرانی صدر کے ساتھ ہر میدان میں تعاون کے لئے تیار ہوں۔