QR Code
یمنی قوم "پابندیوں و سخت ترین سرحدی محاصرے" کے سائے میں جنگبندی نہیں چاہتی، ہشام شرف عبداللہ
22 Jun 2021 21:31
میڈیا کیساتھ گفتگو میں یمنی وزیر خارجہ نے جنگبندی کی سعودی پیشکش پر ردعمل کا اظہار کرتے ہوئے تاکید کی ہے کہ عالمی جارح قوتوں کیجانب سے اپنے بین الاقوامی پروپیگنڈے کے ذریعے جارح سعودی عرب کو (سابقہ و موجودہ یمنی حکومتوں کے درمیان) ثالث کی حیثیت سے پیش کرتے ہوئے یمن پر اسکی کھلی جارحیت اور بنیادی انسانی حقوق کیخلاف سنگین جرائم کے حوالے سے جارح سعودی شاہی رژیم کو بری کیا جا رہا ہے تاہم یمنی قوم ناجائز پابندیوں اور سخت ترین سرحدی محاصرے کے سائے میں پیش کی جانیوالی جنگبندی کے کسی بھی گھناؤنے منصوے کو ہرگز قبول نہیں کریگی۔
اسلام ٹائمز۔ یمنی وزیر خارجہ ہشام شرف عبداللہ نے میڈیا کے ساتھ اپنی گفتگو میں تاکید کی ہے کہ عالمی جارح قوتوں کی جانب سے بین الاقوامی سطح پر جارح سعودی شاہی رژیم کی حمایت میں سیاسی کمپین چلائی جا رہی ہے جس کا مقصد جارح سعودی عرب کو (سابق و موجودہ یمنی حکومتوں کے درمیان) ثالث ظاہر کرنا اور یمن کے خلاف کھلی جارحیت اور بنیادی انسانی حقوق کے خلاف اس جارحیت کے سنگین نتائج کی ذمہ داری کو جارح سعودی شاہی رژیم کے کاندھوں سے اتار پھینکنا ہے۔ عرب چینل المیادین کے مطابق یمنی وزیر خارجہ نے تاکید کی یمنی قوم پابندیوں اور سخت ترین سرحدی محاصرے کے سائے میں پیش کی جانے والی صلح و جنگ بندی کو ہرگز قبول نہیں کر سکتی۔
ہشام شرف عبداللہ نے انکشاف کرتے ہوئے کہا کہ یمنی قوم کے سخت ترین سرحدی محاصرے کی ذمہ داری ریاض و ابوظہبی کے پاس ہے جبکہ برطانیہ و امریکہ کی جانب سے اس پر نگرانی کی جا رہی ہے۔ انہوں نے کہا کہ عادلانہ و عزت مندانہ صلح کے لئے ہمارے دروازے کھلے ہیں؛ ایک ایسی صلح جو یمنی مفاد و عزت و آبرو کی ضامن ہو۔ یمنی وزیر خارجہ نے تاکید کی کہ یمنی قیام اور اس کی سیاسی، فوجی و اجتماعی استقامت نے جارح سعودی شاہی رژیم کے جنگی جرائم کو جواز فراہم کرنے کی تمام عالمی سازشوں پر پانی پھیر کر رکھ دیا ہے۔ انہوں نے اپنی گفتگو کے آخر میں زور دیتے ہوئے کہا کہ یمن میں موجود انسانی بحران کے حل کے مسئلے کو یمنی سیاسی و سکیورٹی مسائل کے ساتھ جوڑا نہیں جانا چاہئے کیونکہ خوراک، دوائیں اور ایندھن نہ صرف یمنی قوم کی ملکیت بلکہ ان کا بنیادی انسانی حق بھی ہے۔
خبر کا کوڈ: 939492