اسلام ٹائمز۔ شدید گرمی کے موسم کی آمد کے ساتھ ساتھ کوئٹہ میں بجلی بھی ناپید ہونے لگی ہے، کوئٹہ الیکٹرک سپلائی کمپنی کی جانب سے شہر کے بعض علاقوں میں 18 گھنٹوں تک لوڈشیڈنگ جاری ہے۔ تفصیلات کے مطابق پشتون آباد، ہزارہ ٹاؤن، کاکڑ کالونی، سریاب روڈ، سرکی روڈ اور شہر کے بعض دیگر علاقوں میں شدید گرمی میں کیسکو کی مجرمانہ غفلت کے باعث غیر اعلانیہ لوڈشیڈنگ کا دورانیہ 18 گھنٹوں تک جا پہنچا ہے، جس کی وجہ سے عوام کی زندگی بہت متاثر ہوئی ہے اور لوگوں میں شدید غم و غصے کے آثار نظر آنے لگے ہیں۔ عوام الناس کا کہنا ہے کہ بروقت بل کی ادائیگی کے باوجود غیر اعلانیہ لوڈشیڈنگ کا سامنا ہوتا ہے۔