بھارت میں نئے کورونا کیسز کی تعداد 41 ہزار سے متجاوز، 581 افراد ہلاک

اسلام ٹائمز۔ بھارت میں کورونا کیسز کی یومیہ تعداد پھر 40 ہزار سے تجاوز کر گئی جبکہ شفایاب ہونے والوں کی تعداد نئے معاملوں سے کم رہی۔ مرکزی وزارت صحت کے جمعرات کی صبح جاری کئے گئے اعداد و شمار کے مطابق بھارت بھر میں گزشتہ 24 گھنٹوں کے دوران کورونا کے 41806 کیسز رپورٹ ہوئے، اس اثنا میں 39130 افراد شفایاب ہوگئے جبکہ 581 افراد نے دم توڑ دیا۔

نئے معاملوں کے بعد کورونا کیسز کی مجموعی تعداد 3 کروڑ 9 لاکھ 87 ہزار سے تجاوز کر گئی، جن میں سے 3 کروڑ ایک لاکھ 43 ہزار سے زیادہ شفایاب ہوچکے ہیں۔ بھارت بھر کے 4 لاکھ 11 ہزار سے زیادہ افراد اس وبا کے سبب دم توڑ چکے ہیں جبکہ ملک میں اب 4 لاکھ 32 ہزار کے قریب کیسز فعال رہ گئے ہیں۔